Душанбе, 29 сентябр, – АИ «Корвон Иттилоот». Инфрасохтори энергетикии Вилояти Мухтори Кӯҳистони Бадахшон бо як қатор иншооти нав, ки ба баланд бардоштани эътимоднокии таъминоти барқ ва густариши истифодаи манбаъҳои барқароршавандаи энергия равона шудаанд, тақвият ёфт.
Дар ҷараёни сафари корӣ ба ВМКБ Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар ноҳияҳои Ишкошим, Шуғнон, Рӯшон ва Мурғоб зеристгоҳ, хатҳои интиқоли барқ, неругоҳҳои офтобӣ ва хурди барқи обӣ, инчунин дастгоҳҳои таҷрибавии истеҳсоли неруи барқ аз ҳисоби шамолро ба истифода супориданд.
Яке аз иншооти калидӣ зеристгоҳи «Козидеҳ» бо шиддати 110/35 кВ мебошад, ки дар деҳаи Козидеҳии ноҳияи Ишкошим сохта шудааст. Ин иншоот дар доираи лоиҳаи барқрасонии Бадахшон бунёд гардида, барои таҳкими шабакаҳои барқӣ ва баланд бардоштани эътимоднокии таъминоти неруи барқи ноҳияи Ишкошим пешбинӣ шудааст.
Ҳамзамон, дар ноҳияи Шуғнон иншооти нави энергетикаи офтобӣ бо иқтидори 3 МВт мавриди истифода қарор гирифт. Неругоҳи офтобӣ дар деҳаи Рож ҷойгир буда, аз ҷумлаи иншооти бузурги энергетикии вилоят ба ҳисоб меравад, ки аз манбаъҳои барқароршавандаи энергия истифода мебарад. Барои истеҳсоли неруи барқ дар ин ҷо 4752 панели офтобӣ насб шудааст.
Боз як неругоҳи офтобӣ бо иқтидори 112 кВт дар деҳаи Вранги ноҳияи Рӯшон ба истифода дода шуд. Ҳадафи асосии бунёди он беҳтар намудани таъминоти неруи барқи сокинони деҳа мебошад. Барои маҳалҳои кӯҳистон чунин лоиҳаҳо аҳаммияти мустақими иҷтимоӣ дошта, дастрасии боэътимод ба неруи барқ яке аз заминаҳои асосии рушди инфрасохтори иҷтимоӣ ва беҳтар намудани шароити зиндагии аҳолӣ мебошад.
Ба низоми энергетикии ноҳияи Рӯшон ҳамчунин ду иншооти хурди гидроэнергетикӣ ворид гардид. Дар ҷамоати деҳоти Бартанг неругоҳи хурди барқи обӣ бо иқтидори 25 кВт ба истифода дода шуд, ки барои таъмини эҳтиёҷоти энергетикии деҳаи Бидҷав пешбинӣ шудааст. Ба истифода додани он барои дастрасии доимии сокинон ба неруи барқ ва рушди минбаъдаи инфрасохтори иҷтимоии деҳа шароити мусоид фароҳам меорад.
Дар деҳаи Девлохи ҷамоати деҳоти Барӯшон боз як неругоҳи барқи обӣ бо иқтидори 15 кВт ба истифода дода шуд. Амалӣ намудани чунин лоиҳаҳои хурди энергетикӣ дар маҳалҳои аҳолинишин барои таҳкими заминаи инфрасохтории деҳот ва фароҳам овардани шароити иловагӣ барои рушди онҳо мусоидат мекунад.
Дар маҷмӯи нави энергетикӣ ноҳияи Мурғоб ҷойгоҳи махсус дорад, зеро дар ин ҷо ҳамзамон ба рушди энергетикаи офтобӣ ва бодӣ таваҷҷуҳ зоҳир шудааст. Дар деҳаи Тохтамиши ҷамоати деҳоти Қизилработ ба таври фосилавӣ ду неругоҳи таҷрибавии барқи бодӣ бо иқтидори умумии 200 кВт ба истифода дода шуданд. Бунёди онҳо дар доираи ҳамкории Ҷумҳурии Тоҷикистон бо шарикони рушд амалӣ гардидааст.
Дар ҳамин мавзеъ, дар масоҳати беш аз як гектар, панелҳои офтобӣ бо иқтидори умумии 1138 кВт насб шудаанд. Иқтидори захираи энергия дар батареяҳои аккумуляторӣ ба 590 кВт-соат мерасад. Маҷмӯи мазкур имкон медиҳад, ки 145 хоҷагӣ дар давоми тамоми сол бо неруи барқ таъмин карда шавад.
Барои ноҳияи Мурғоб, ки дар минтақаи баландкӯҳ бо шароити хоси табиӣ ва иқлимӣ ҷойгир аст, истифодаи ҳамзамони энергияи офтобӣ, бодӣ ва низоми захираи неруи барқ аҳаммияти махсус дорад.
Чунин равиш имкон медиҳад, ки на танҳо иқтидори маҳаллии манбаъҳои барқароршавандаи энергия истифода шавад, балки барои таъмини устувори неруи барқи маҳалҳои дурдаст низ заминаи бештар фароҳам гардад.
Инчунин дар ноҳияи Рӯшон хати интиқоли барқи 110 кВ ба истифода дода шуд. Дарозии он 42 километр мебошад. Бунёд ва ба истифода супоридани хати нави интиқоли барқ барои рушди минбаъдаи инфрасохтори энергетикии ноҳия, баланд бардоштани устувории шабака ва эътимоднокии таъминоти барқ аҳаммияти муҳим дорад.
Ҳамин тариқ, иншооти нави ба истифода додашуда чанд самти рушди энергетикии Бадахшонро ба ҳам мепайванданд — таҳкими инфрасохтори мавҷудаи шабакавӣ, густариши гидроэнергетикаи хурд ва истифодаи васеи неруи офтобӣ ва бодӣ.
Барои ноҳияҳои кӯҳистон, ки дурии маҳалҳои аҳолинишин ва релефи мураккаб нисбат ба инфрасохтори энергетикӣ талаботи махсус мегузорад, рушди манбаъҳои маҳаллии неруи барқ яке аз унсурҳои муҳими рушди дарозмуддати иҷтимоию иқтисодӣ мебошад.
Маҷмӯи нави иншоот ҳамзамон эътимоднокии низоми мавҷудаи энергетикиро тақвият дода, имкониятҳои истифодаи иқтидори табиии Бадахшон — офтоб, об ва шамолро васеъ менамояд.
Акс: Хадамоти матбуоти Президенти Ҷумҳурии Тоҷикистон