Душанбе, 8 октябр, – АИ «Корвон Иттилоот». Дар деҳаи Сомониёни деҳоти Зафарии ноҳияи Фархор дар доираи сафари кории Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба шаҳру ноҳияҳои минтақаи Кӯлоб корхонаи коркарди пахтаи Ҷамъияти дорои масъулияти маҳдуди «Пахтаи Фархор» пас аз таъмиру азнавсозӣ мавриди баҳрабардорӣ қарор дода шуд.

Корхонаи навсозишуда барои коркарди то 16 ҳазор тонна пахта дар як сол пешбинӣ гардида, барои тақвияти коркарди ашёи хоми кишоварзӣ бевосита дар ноҳия имконият фароҳам меорад.

Дар маросими ба истифода додани корхона раиси вилояти Хатлон Давлаталӣ Саид, намояндаи Ҳукумати Ҷумҳурии Тоҷикистон, муовини якуми вазири адлия Мансурҷон Умаров, роҳбарияти ноҳияи Фархор ва дигар масъулони мақомоти давлатӣ иштирок намуданд.

Таъмиру азнавсозии корхона бо ташаббус ва сармоягузории соҳибкор Раҳмон Азимов анҷом дода шудааст. Корхона дар масоҳати умумии 2,5 гектар ҷойгир буда, пас аз таҷдид имкониятҳои истеҳсолӣ ва иқтидори коркарди пахтаи хом дар он васеъ гардиданд.

Зимни шиносоӣ бо фаъолияти корхона раиси вилояти Хатлон таъкид намуд, ки рушди саноат, коркарди амиқи ашёи хоми маҳаллӣ ва таъсиси ҷойҳои нави корӣ аз самтҳои афзалиятноки сиёсати иқтисодии давлат ба ҳисоб мераванд.

Барои ноҳияи Фархор, ки дорои имкониятҳои васеи кишоварзӣ ва бахусус иқтидори муносиб барои рушди пахтакорӣ мебошад, ба роҳ мондани коркарди пахта дар дохили ноҳия барои зиёд намудани арзиши иловагии маҳсулот, таҳкими заминаи саноатӣ ва беҳтар гардидани имкониятҳои иқтисодии аҳолӣ аҳамияти муҳим дорад.

Давлаталӣ Саид ҳамчунин соҳибкоронро ба густариши фаъолияти истеҳсолӣ, истифодаи самараноки иқтидорҳои мавҷуда ва саҳми бештар дар рушди иқтисоди минтақа даъват намуд.

Тибқи иттилои роҳбарияти корхона, дар ин ҷо зиёда аз 80 нафар бо ҷойи кори доимӣ ва маоши муносиб таъмин мебошанд. Ба ҷалби занону бонувон ба фаъолияти истеҳсолӣ низ таваҷҷуҳи махсус зоҳир шуда, зиёда аз 20 нафар кормандони корхона занон мебошанд, ки дар фаъолияти истеҳсолӣ бевосита иштирок мекунанд.

Дар сохтори корхона ҳамчунин кооперативи тиҷоратии «Шамшод» фаъолият менамояд. Бо мақсади таъмин намудани хоҷагиҳои деҳқонӣ бо тухмии хушсифат дар майдони 200 гектар навъи пахтаи ба шароити иқлимии минтақа мутобиқ кишт карда шудааст. Чунин ҳамгироии истеҳсол, тухмипарварӣ ва коркарди ашёи хом ба таҳкими заминаи ашёи хоми корхона ва фароҳам овардани шароит барои баланд бардоштани ҳосилнокии пахта мусоидат мекунад.

Иқтидори солонаи корхонаи коркарди пахта 16 ҳазор тоннаро ташкил медиҳад. Ин имконият медиҳад, ки дар мавсими ҷамъоварии ҳосил на танҳо пахтаи истеҳсолшудаи ноҳияи Фархор, балки ашёи хоми ноҳияҳои гирду атроф низ қабул ва коркард карда шавад.

Айни замон дар корхона қабули ҳосили пахтаи соли 2026 идома дорад. То имрӯз 330 тонна пахта қабул гардидааст. Ҳамзамон, корхона имкони қабули ашёи хомро аз ноҳияҳои ҳамсоя низ дорад, ки барои сари вақт ҷамъоварӣ, нигоҳдорӣ ва коркарди маҳсулоти кишоварзии истеҳсолшуда мусоидат хоҳад кард.

Ба иттилои масъулон, то имрӯз дар корхона 2 ҳазору 200 тонна пахта коркард гардида, 750 тонна нахи соф истеҳсол шудааст.

Самти муҳими дигари фаъолияти корхона коркарди маҳсулоти иловагии пахтакорӣ мебошад. Дар ҳудуди маҷмаа коргоҳи равғанбарорӣ фаъолият дошта, аз пумбадона, ки дар раванди коркарди пахта ба даст меояд, равғани растанӣ истеҳсол карда мешавад. Иқтидори солонаи коргоҳи равғанбарорӣ 1 ҳазору 800 тонна пумбадонаро ташкил медиҳад.

Фаъолияти ҳамзамони корхонаҳои коркарди пахта ва равғанбарорӣ имкон медиҳад, ки ашёи хоми воридшуда самараноктар истифода гардида, аз он чанд навъи маҳсулоти саноатӣ ба даст оварда шавад. Аз нигоҳи иқтисодӣ, чунин модел сатҳи коркарди ашёи хомро боло бурда, барои ташаккули арзиши иловагӣ дар дохили ноҳия ва истифодаи васеи ашёи хоми ватанӣ имконият фароҳам меорад.

Ба фаъолият оғоз намудани корхонаи навсозишуда дар доираи ҳадафи саноатикунонии босуръати кишвар ва дастгирии соҳибкории истеҳсолӣ сурат гирифта, барои ноҳияи Фархор, ки пахтакорӣ яке аз самтҳои муҳими истеҳсолоти кишоварзии он ба ҳисоб меравад, аҳамияти саноатӣ ва иқтисодии хос дорад.

Коркарди пахта бевосита дар ноҳия имкон медиҳад, ки ашёи хом то марҳилаи истеҳсолоти саноатӣ дар масофаи кӯтоҳтар коркард шуда, аз ҳисоби коркарди он арзиши маҳсулот афзоиш ёбад ва робитаи байни бахшҳои кишоварзӣ ва саноат тақвият ёбад. Дар асл, сухан дар бораи рушди занҷираи «ашёи хом — коркард — маҳсулоти тайёр» меравад, ки яке аз шартҳои муҳими баланд бардоштани самаранокии истифодаи захираҳои маҳаллӣ мебошад.

Густариши иқтидорҳои истеҳсолӣ ҳамзамон барои зиёд намудани шуғли аҳолӣ, рушди соҳибкории маҳаллӣ ва афзоиши ҳаҷми истеҳсоли маҳсулоти саноатӣ имкониятҳои иловагӣ фароҳам меорад. Ба кор даромадани корхонаи таҷдидшуда ҳамчунин талаботро ба ашёи хоми кишоварзӣ дар дохил зиёд намуда, барои истифодаи пурратари маҳсулоти пахтакорӣ шароит фароҳам месозад.

Ҳамин тариқ, азнавсозии ҶДММ «Пахтаи Фархор» иқтидори саноатии ноҳияро таҳким бахшида, барои рушди минбаъдаи коркарди ашёи хоми кишоварзӣ, истифодаи самараноки захираҳои маҳаллӣ ва афзоиши истеҳсоли маҳсулоти рақобатпазири ватанӣ заминаи мусоид фароҳам меорад.

АКС: Мақомоти иҷроияи ҳокимияти давлатии вилояти Хатлон