Душанбе, 14 октябр, – АИ «Корвон Иттилоот». Дар Тоҷикистон Муколамаи чоруми минтақавӣ оид ба иқтисоди даврӣ дар Осиёи Марказӣ баргузор гардид.

Ҳамоиш таҳти раёсати муовини Раиси Маҷлиси намояндагони Маҷлиси Олии Ҷумҳурии Тоҷикистон Азиз Гиёзода доир шуда, намояндагони парламентҳои кишварҳои минтақа, мақомоти давлатӣ, Иттиҳоди Аврупо, созмонҳои байналмилалӣ, муассисаҳои молиявӣ, доираҳои соҳибкорӣ ва ҷомеаи коршиносонро ба ҳам овард.

Иштирокчиён робитаи иқтисоди давриро бо масъалаҳои иқлим ва сармоягузорӣ, инчунин имкониятҳои рушди соҳибкорӣ ва соҳибкории инноватсионӣ баррасӣ намуданд. Муколама дар ҳамкорӣ бо Маҷлиси намояндагони Маҷлиси Олии Ҷумҳурии Тоҷикистон, дар доираи барномаи Иттиҳоди Аврупо SWITCH-Asia ва бо дастгирии Маркази минтақавии экологии Осиёи Марказӣ (CAREC) баргузор гардид.

Азиз Гиёзода зимни сухани ифтитоҳӣ таъкид кард, ки иқтисоди даврӣ имрӯз аз доираи масъалаҳои экологӣ ва идоракунии партовҳо берун рафта, ба яке аз самтҳои муҳими рушди иқтисодӣ, навсозии саноат, баланд бардоштани рақобатпазирӣ, ҷалби сармоягузорӣ ва таъмини устувории иқлимӣ табдил ёфтааст.

Иқтисоди даврӣ истифодаи оқилонаи ашёи хом ва дигар захираҳо, кам кардани ҳаҷми партовҳо ва бозгардонидани маводро ба давраи истеҳсолот дар назар дорад.

Барои кишварҳои Осиёи Марказӣ рушди чунин низом на танҳо ба ҳалли масъалаҳои экологӣ, балки ба фароҳам овардани имкониятҳои нав барои соҳибкорӣ, саноат ва ҳамкориҳои байнидавлатӣ низ мусоидат мекунад.

Дар ҷаласаҳои корӣ вакилони парламентҳои Қазоқистон, Қирғизистон, Тоҷикистон, Туркманистон ва Ӯзбекистон масъалаҳои такмили қонунгузорӣ дар соҳаи иқтисоди даврӣ, ҷанбаҳои иқлимӣ ва сармоягузорӣ, нақши соҳибкорӣ дар татбиқи принсипҳои иқтисоди даврӣ ва роҳҳои густариши ҳамкориҳои байнипарлумониро баррасӣ карданд.

Раиси Комиссияи экологии Маҷлиси намояндагони Маҷлиси Олии Ҷумҳурии Тоҷикистон Ориф Амирзода оид ба корҳои анҷомдодашуда дар самти таҳия ва қабули Кодекси экологӣ, рушди низоми идоракунии партовҳо ва ворид намудани нишондиҳандаҳои мушаххаси иқтисоди даврӣ ба Барномаи миёнамуҳлати рушди Ҷумҳурии Тоҷикистон барои солҳои 2026–2030 маълумот пешниҳод намуд.

«Мо тадриҷан аз муҳокимаи принсипҳои иқтисоди даврӣ ба ташаккули қоидаҳои татбиқи амалии он мегузарем. Барои Тоҷикистон қадами навбатӣ бояд пайвастани ин унсурҳо ба як занҷири ягона бошад: қонунгузорӣ — қарорҳои даврӣ — таъсири иқлимӣ — сармоягузорӣ», — таъкид намуд Ориф Амирзода.

Иштирокчиён аҳаммияти рушди минбаъдаи Платформаи парламентии кишварҳои Осиёи Марказӣ, табодули таҷрибаи қонунгузорӣ ва таҳкими ҳамкории парламентҳо бо мақомоти давлатӣ, бахши соҳибкорӣ, муассисаҳои молиявӣ ва шарикони байналмилалиро таъкид намуданд.

Чунин ҳамкорӣ метавонад ба пешбурди принсипҳои иқтисоди даврӣ ва истифодаи самараноки захираҳо дар минтақа мусоидат кунад. Ҳамоҳангсозии равишҳои қонунгузорӣ, фароҳам овардани шароити мусоид барои сармоягузорӣ ва ҷалби бештари соҳибкорон ба гузариш ба моделҳои устувори истеҳсол ва истеъмол дар ин раванд аҳаммияти хос доранд.

Дар доираи барномаи муколама вакилони даъватшудаи парламентҳои кишварҳои Осиёи Марказӣ аз Маҷлиси намояндагони Маҷлиси Олии Ҷумҳурии Тоҷикистон боздид намуда, бо раванди қонунгузории кишвар шинос мешаванд. Ҳамчунин, боздиди шиносоӣ аз корхонаи «AKIA Avesto» пешбинӣ гардидааст, ки дар он ба иштирокчиён раванди истеҳсоли автобусҳо ва электробусҳо муаррифӣ карда мешавад.

Натиҷаҳои муколама ҳавасмандии иштирокчиёнро ба идомаи ҳамкориҳои минтақавии байнипарлумонӣ, табодули таҷрибаи қонунгузорӣ ва таҳкими шарикӣ ҷиҳати рушди иқтисоди даврӣ ва истифодаи оқилонаи захираҳо дар Осиёи Марказӣ инъикос намуданд.

Акс: Маҷлиси намояндагони Маҷлиси Олии Ҷумҳурии Тоҷикистон