Душанбе, 24 октябр, – АИ «Корвон Иттилоот». Бонки ҷаҳонӣ барои дастгирии Академияи илмҳои кишоварзии Тоҷикистон ва муассисаҳои илмӣ-таҳқиқотии он беш аз 5 миллион доллари ИМА ҷудо кардааст.

Ин маблағҳо барои навсозии инфрасохтори озмоишгоҳӣ, харидории таҷҳизоти муосир ва тақвияти имкониятҳои техникии муассисаҳое равона шудаанд, ки дар таъминоти илмии соҳаи кишоварзӣ саҳм мегузоранд.

Рӯзи 23 октябр маросими ба истифода додани таҷҳизоти нави озмоишгоҳии Академияи илмҳои кишоварзии Тоҷикистон баргузор гардид. Дар ин чорабинӣ муовини Сарвазири Ҷумҳурии Тоҷикистон Сулаймон Зиёзода ва вазири кишоварзӣ Қурбон Ҳакимзода иштирок карданд.

Дастгирӣ дар доираи лоиҳаи «Баланд бардоштани устувории кишоварзӣ», ки аз ҷониби Бонки ҷаҳонӣ маблағгузорӣ мешавад, амалӣ мегардад. Ҳангоми муайян кардани самтҳои афзалиятнок нақши соҳаи кишоварзӣ дар иқтисодиёти миллӣ ба назар гирифта мешавад. Тибқи маълумоти пешниҳодшуда, ҳиссаи ин соҳа тақрибан 25 фоизи иқтисодиёти кишварро ташкил медиҳад.

Лоиҳа як қатор муассисаҳои илмӣ ва махсусгардонидашудаи Академияро фаро мегирад. Ба онҳо Институти хокшиносӣ, Институти зироаткорӣ, Маркази технологияҳои инноватсионӣ ва механиконии кишоварзӣ, Маркази миллии захираҳои генетикӣ ва дигар муассисаҳо дохил мешаванд.

Корҳои пешбинишуда сохтмон ва барқарорсозии якчанд озмоишгоҳ, таъмин намудани онҳо бо таҷҳизоти лабораторӣ ва кишоварзӣ, инчунин дастрас кардани воситаҳои технологияҳои иттилоотиро дар бар мегиранд.

Навсозии заминаи озмоишгоҳӣ барои васеъ намудани имкониятҳои илми кишоварзӣ дар самти гузаронидани таҳқиқот ва ҷорӣ намудани усулҳои муосир дар истеҳсолоти кишоварзӣ замина фароҳам меорад. Барои Тоҷикистон, ки соҳаи кишоварзӣ дар иқтисодиёти он нақши муҳим дорад, рушди инфрасохтори илмӣ ҷиҳати баланд бардоштани устувории соҳа ва такмили усулҳои амалии фаъолияти он аҳаммияти хос дорад.

Акс: World Bank Group Tajikistan – Гурӯҳи Бонки ҷаҳонӣ дар Тоҷикистон