Астана, 2026 жылғы 23 маусым – Karavan Info ақпараттық агенттігі. Елордадағы Жақсылық Үшкемпіров атындағы жекпе-жек өнері сарайында Алтай Одағының таэквондодан чемпионаты ашылды. Турнирге Әзірбайжан, Қырғызстан, Моңғолия, Корея, Ресей, Түркия, Өзбекстан және Қазақстан командалары қатысуда.

Туризм және спорт министрі Ербол Мырзабосынов турнирдің Астанада өткізілуі еліміздегі таэквондоның дамуына жаңа серпін беретінін және жас спортшылардың тәжірибе жинақтауына мүмкіндік беретінін атап өтті.

Дүниежүзілік таэквондо президенті доктор Чунгвон Чоу Алтай одағы достық, ынтымақтастық және бірлік үшін құрылғанын, тек шекараларды ғана емес, сонымен қатар мәдениеттер мен болашақ ұрпақтарды біріктіретінін мәлімдеді.

Қазақстан таэквондо федерациясының президенті Құдрат Шамиев чемпионаттың Қазақстанда алғаш рет өткізіліп отырғаны елдер арасындағы спорттық байланысты нығайтып, отандық спортшыларға халықаралық тәжірибе беретінін атап өтті.

Дүниежүзілік федерацияның ресми демо-топы салтанатты рәсімде өнер көрсетті. Сондай-ақ, Қазақстандағы алғашқы толықметражды таэквондо фильмінің тизері ұсынылды. Түсірілімдер Қазақстан мен Кореяда өтті, ал премьерасы қазан айына жоспарланған.

Жасөспірімдер мен ересектер арасындағы турнир Дүниежүзілік таэквондоның ресми күнтізбесіне енгізілген және 23 маусымға дейін жалғасады.

Фото : Қазақстан Республикасы Туризм және спорт министрлігі