ООГАНСТАН, 2026-жылдын 15-октябры – Karavan Info маалымат агенттиги. Талибандын тышкы иштер министри Амир Хан Муттаки кыймыл тең салмактуу тышкы саясатынын бир бөлүгү катары Индия менен мамилелерди өнүктүрүүгө чоң маани берерин билдирди.

Ооганстандын Тышкы иштер министрлигинин шаршемби, 14-октябрда билдиргенине караганда, Муттаки бул билдирүүнү Кабулда Индиянын убактылуу өкүлү Ятин Пател менен таанышуу жолугушуусунда жасады.

Муттакинин айтымында, Ооганстан менен Индиянын ортосундагы соода көлөмү өсүп жатат.

Ал эки өлкөнүн мамлекеттик органдары менен жеке секторунун ортосундагы байланыштарды бекемдөө жана кызматташууну кеңейтүү зарылдыгын белгилеп, алардын мүмкүнчүлүктөрүн толук пайдалануу керектигин айтты.

Өз кезегинде, ооган тарап билдиргендей, Ятин Пател Индиянын Ооганстан менен экономикалык, саясий жана гуманитардык чөйрөлөрдө кызматташууну кеңейтүүгө даяр экенине ишендирди.

Сүрөт: Ооганстандын Тышкы иштер министрлиги