МОСКВА, 2026-жылдын 2-июну – Karavan Info маалымат агенттиги. 1-июнда Орусиянын президенти Владимир Путин Луганск Элдик Республикасынын Старобильск шаарына Украинанын куралдуу күчтөрүнүн соккусун иликтөөгө байланыштуу маселелерди, ошондой эле жабырлануучуларга колдоо көрсөтүү чараларын талкуулоо үчүн ыкчам жыйын өткөрдү.

Мамлекет башчысы окуяны "Украина хунтасынын кандуу кылмышы" деп мүнөздөп, жарадар болгондордун абалы жана аларды калыбына келтирүү боюнча көрүлүп жаткан чаралар тууралуу маалымат берүүнү, ошондой эле маркумдардын үй-бүлөлөрүнө колдоо көрсөтүүнү талап кылды. ЛПРдин башчысы Леонид Пасечник жана Старобельск муниципалдык районунун администрациясынын башчысы Владимир Чернев баяндама жасашты.

Путин террордук чабуулга күнөөлүүлөрдү жазалоо сөзсүз болорун баса белгилеп, чабуулга катышкандардын баарын аныктоо боюнча иштер жүрүп жатканын билдирди.

Эске сала кетсек, 22-майда Украинанын Куралдуу күчтөрү Старобильск педагогикалык колледжинин окуу имаратына жана жатаканасына сокку урган. Бул трагедияда 21 адам каза болуп, 65 адам жаракат алган.

"Террористтик акт" беренеси боюнча кылмыш иши козголду.

28-майда Орусиянын БУУдагы туруктуу өкүлү Василий Небензя Киев режиминин бул кылмыштагы мыкаачылыгы Экинчи дүйнөлүк согуш учурундагы нацисттердин аракеттерине окшош экенин билдирди.

Сүрөт: Россия Федерациясынын Президентинин басма сөз кызматы