Душанбе, 5 октябр, – АИ «Корвон Иттилоот». 1–2 октябри соли 2026 дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон оғози расмии лоиҳаи минтақавии «Беҳтар кардани саломатии модарон, навзодон ва кӯдакон дар Осиёи Марказӣ» баргузор шуд.

Ин ташаббус бо дастгирии молиявии Ҳукумати Федератсияи Русия дар Тоҷикистон ва Қирғизистон дар ҳамкории зич бо Намояндагии Созмони Ҷаҳонии Тандурустӣ ва Маркази миллии тадқиқотии тиббии акушерӣ, гинекологӣ ва перинаталогии ба номи академик В.И. Кулаков (Русия) амалӣ мешавад.

Ҳамзамон бо оғози лоиҳа дар Душанбе омӯзишҳои дурӯза барои педиатрҳо, пизишкони оилавӣ ва роҳбарони марказҳои тиббӣ оғоз гардид. Омӯзиш ба ҷорӣ намудани дастури ҷайбии Созмони Ҷаҳонии Тандурустӣ (СҶТ) оид ба расонидани кӯмаки аввалияи тиббию санитарӣ ба кӯдакон ва наврасон бахшида шудааст. Дастгирии техникии онро коршиносони Донишгоҳи Виттен (Олмон) таҳти роҳбарии профессор Ралф Вайген таъмин мекунанд.

Дар чорабиниҳо муовини вазири тандурустӣ ва ҳифзи иҷтимоии аҳолии Тоҷикистон Зулфия Абдусаматзода, олимон ва мутахассисони пешбари Донишгоҳи давлатии тиббии Тоҷикистон ба номи Абӯалӣ ибни Сино, кормандони Пажӯҳишгоҳи илмӣ-тадқиқотии акушерӣ, гинекологӣ ва перинаталогӣ, коршиносони Бюрои аврупоии СҶТ, инчунин марказҳои профилии Русия ва Олмон иштирок карданд.

Лоиҳа барои 18 моҳ пешбинӣ шудааст. Барои ҷорӣ намудани стандартҳои баланди тиббӣ шаҳру ноҳияҳои вилоятҳои Хатлон ва Суғд, инчунин ноҳияҳои тобеи ҷумҳурӣ, ки ниёзмандии бештар ба навсозии соҳаи модарзоӣ ва педиатрия доранд, интихоб гардидаанд.

Амалисозии ин ташаббус имкон медиҳад, ки тахассуси кормандони тиббӣ ба таври назаррас баланд бардошта шавад, сифати кӯмаки расонидашаванда беҳтар гардад ва нишондиҳандаҳои фавти модарон ва кӯдакон дар кишвар коҳиш ёбад. Ҳамбастагии дастгирии молиявии Русия, таҷрибаи СҶТ ва омӯзишҳои амалӣ бо иштироки мутахассисони олмонӣ равиши ҳамаҷонибаро ба таҳкими низоми ҳифзи саломатии модар ва кӯдак фароҳам меорад. Барои Тоҷикистон, ки омилҳои демографӣ ва иҷтимоӣ нақши муҳим доранд, чунин лоиҳаҳо аҳамияти стратегӣ доранд: онҳо на танҳо ба беҳтар кардани кӯмаки тиббии ҷорӣ, балки ба ташаккули стандартҳои устуворе, ки ба нафъи наслҳои оянда кор хоҳанд кард, равона шудаанд.

АКС: Хадамоти матбуотии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон