Душанбе, 5 октябр, – АИ «Корвон Иттилоот». Вазири энергетика ва захираҳои оби Ҷумҳурии Тоҷикистон Далер Ҷумъа ба маҳалли барои сохтмони Неругоҳи барқи обии «Хуталон», ки қаблан бо номи НБО «Шӯроб» маъруф буд, сафари корӣ анҷом дод.

Зимни боздид роҳбари соҳа бо қитъаҳои замини барои ҷойгирсозии иншооти асосии гидроузели оянда, аз ҷумла сарбанд, толори агрегатҳо ва дигар инфрасохтори вобаста ба лоиҳа пешбинишуда шинос шуд.

Лоиҳаи «Хуталон» яке аз самтҳои ояндадори истифодаи минбаъдаи иқтидори бузурги гидроэнергетикии дарёи Вахш ба ҳисоб меравад. Мувофиқи нишондиҳандаҳои пешакии асосноккунии техникию иқтисодӣ, НБО дар маҷрои дарёи Вахш, байни ду иншооти бузурги силсилаи обию энергетикии кишвар — НБО «Роғун» дар болооб ва НБО «Норак» дар поёноб — бунёд хоҳад шуд.

Иқтидори лоиҳавии НБО «Хуталон» 800 МВт муайян гардида, насби шаш гидроагрегат пешбинӣ шудааст. Тибқи нишондиҳандаҳои қаблан нашршуда, истеҳсоли миёнаи солонаи неруи барқ дар неругоҳ метавонад ба 2,684 миллиард кВт·соат расад. Ин ба афзоиши иқтидори тавлидии низоми энергетикӣ ва истифодаи самараноки захираҳои обии силсилаи неругоҳҳои дарёи Вахш мусоидат хоҳад кард.

Дар қарорҳои пешакии лоиҳавӣ сохтмони сарбанди сангиву гилӣ бо баландии 76 метр ва паҳноии 234 метр пешбинӣ шудааст. Дарозии толори агрегатҳо 225 метр, паҳноии он 45 метр ва баландӣ 60 метр хоҳад буд. Ҳаҷми муфиди обанбор 4 миллион метри мукааб арзёбӣ гардида, муҳлати пешбинишудаи сохтмони неругоҳ 72 моҳро ташкил медиҳад. Арзиши ибтидоии лоиҳа тақрибан 2,247 миллиард доллари ИМА арзёбӣ шудааст.

Ҷойгиршавии неругоҳи нав дар низоми силсилаи неругоҳҳои Вахш барои рушди инфрасохтори энергетикии Тоҷикистон аҳамияти стратегӣ дорад.

Лоиҳа ба афзоиши иқтидори истеҳсолии кишвар ва истифодаи фарогири захираҳои гидроэнергетикии дарё равона шуда, ҳамзамон барои таҳкими устувории низоми энергетикӣ имкониятҳои иловагӣ фароҳам меорад.

Бунёди НБО «Хуталон» дар доираи ҳадафҳои дарозмуддати Тоҷикистон оид ба таъмини истиқлоли энергетикӣ ва рушди иқтисоди «сабз» баррасӣ мешавад. Татбиқи чунин лоиҳаи бузурги гидроэнергетикӣ метавонад заминаи истеҳсолии соҳа ва имкониятҳои кишварро барои таъмини талаботи дохилӣ ва рушди ҳамкории энергетикӣ васеъ намояд.

Ҳамин тариқ, боздиди кории вазири энергетика аз маҳалли сохтмон марҳилаи дигари пешбурди лоиҳа ба шумор рафта, интизор меравад, ки НБО «Хуталон» дар рушди минбаъдаи силсилаи неругоҳҳои барқи обии дарёи Вахш мавқеи муҳимро ишғол намояд.

ФОТО: Хадамоти матбуоти Вазорати энергетика ва захираҳои оби Ҷумҳурии Тоҷикистон (@mewrtj)