Душанбе, 26 май, – АИ «Корвон Иттилоот». Имрӯз дар шаҳри Душанбе дар ҳошияи Конфронси чоруми байналмилалии сатҳи баланд оид ба Даҳсолаи байналмилалии амал «Об барои рушди устувор, солҳои 2018–2028» Форуми ҷавонон ва об баргузор гардид, ки ба яке аз майдонҳои муҳимми муколама миёни насли ҷавон, сохторҳои давлатӣ ва шарикони байналмилалӣ табдил ёфт.

Форум бо ташаббуси Ҳукумати Ҷумҳурии Тоҷикистон, Кумитаи кор бо ҷавонон ва варзиш, Вазорати энергетика ва захираҳои об ва Кумитаи ҳифзи муҳити зист баргузор шуда, аз ҷониби Шабакаи миллии ҷавонон барои об ва иқлим роҳандозӣ гардид. Ин ҳамоиш бори дигар нишон дод, ки масъалаи об имрӯз танҳо мавзӯи зербиноӣ ё экологӣ нест, балки ба самти муҳими сиёсати рушди устувор, маърифати ҷомеа ва иштироки фаъоли ҷавонон дар ҳалли мушкилоти ҷаҳонӣ табдил ёфтааст.

Дар чорабинӣ намояндагони мақомоти давлатӣ, созмонҳои байналмилалӣ, шарикони рушд ва ҷавонони фаъол иштирок намуданд. Ҳадафи асосии форум баррасии масъалаҳои вобаста ба обу иқлим, баланд бардоштани нақши ҷавонон дар ҳифзи захираҳои об ва таҳкими маърифати экологӣ арзёбӣ гардид.

Муовини Сарвазири Ҷумҳурии Тоҷикистон муҳтарам Зиёзода Сулаймон Ризо зимни суханронӣ таъкид намуданд, ки ҷавонон метавонанд дар ҳалли масъалаҳои глобалии вобаста ба об ва иқлим саҳми муассир гузоранд. Ба гуфтаи ӯ, маҳз насли ҷавон метавонад тавассути дониш, ташаббускорӣ, истифодаи технологияҳои нав ва муносибати масъулона ба муҳити зист ба пешбурди рӯзномаи обии кишвар ва ҷаҳон такони ҷиддӣ бахшад.

Иштирокчиён ҳамчунин оид ба ташаббусҳои байналмилалии Тоҷикистон дар соҳаи об, истифодаи самараноки захираҳои об ва таҳкими ҳамкориҳои байналмилалӣ мубодилаи афкор намуданд. Дар муҳокимаҳое, ки дар ҳошияи форум сурат гирифт, масъалаҳои ҷалби ҷавонон ба ташаббусҳои экологӣ, рушди фарҳанги сарфакорона истифода бурдани об, густариши маърифати иқлимӣ ва дастгирии лоиҳаҳои инноватсионӣ дар маркази таваҷҷуҳ қарор доштанд.

Форуми ҷавонон ва об дар Душанбе дар заминае баргузор шуд, ки Тоҷикистон имрӯз худро ҳамчун яке аз ташаббускорони фаъоли рӯзномаи ҷаҳонии об муаррифӣ мекунад. Ҷалби ҷавонон ба ин раванд на танҳо ба таҳкими пайванди наслҳо мусоидат мекунад, балки ба ташаккули пойгоҳи устувори инсонӣ барои ҳифзи захираҳои табиӣ ва татбиқи ҳадафҳои рушди устувор замина мегузорад.

Дар анҷоми форум омодагии ҷонибҳо барои густариши ҳамкорӣ ва татбиқи иқдомҳои муштарак дар самти ҳифзи захираҳои об ва рушди устувор таъкид гардид. Ин бори дигар нишон дод, ки ояндаи сиёсати обии кишвар танҳо дар сатҳи ҳукуматҳо ва созмонҳо муайян намешавад, балки иштироки фаъоли ҷавонон дар он нақши афзоянда мегирад.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон