Душанбе, 28 октябр, – АИ «Корвон Иттилоот». Намояндагони ҷавонони Тоҷикистон дар Форуми байналмилалии ҷавонони Иттиҳоди Давлатҳои Мустақил (ИДМ) таҳти унвони «Экосистемаҳои инноватсионӣ ва роҳбарии ҷавонон дар кишварҳои ИДМ», ки дар шаҳри Тошканд баргузор гардид, иштирок намуданд.

Форум ба табодули таҷриба, рушди малакаҳои роҳбарӣ ва густариши ҳамкориҳои ҷавонони кишварҳои узви Иттиҳод бахшида шуд.

Дар доираи ҳамоиш намояндагони Тоҷикистон таҷрибаи кишварро дар самти татбиқи сиёсати давлатии ҷавонон, ташаббусҳои созанда, дастовардҳои даврони истиқлол ва имкониятҳои фароҳамовардаи Ҳукумати Ҷумҳурии Тоҷикистон барои рушди насли ҷавон муаррифӣ карданд.

Барномаи форум масъалаҳои рушди экосистемаҳои инноватсионӣ, роҳбарии ҷавонон, соҳибкорӣ, технологияҳои муосир ва иштироки фаъоли ҷавононро дар равандҳои рушди ҷомеа фаро гирифт. Ин мавзӯъҳо барои баррасии имкониятҳои татбиқи ғояҳои нав, рушди иқтидори зеҳнӣ ва эҷодии ҷавонон ва таҳкими робитаҳои байниҳамдигарӣ замина фароҳам оварданд.

Иштирок дар форум ба ҷавонони тоҷик имкон дод, ки бо таҷрибаи кишварҳои дигар шинос шаванд, робитаҳои нави ҳамкорӣ барқарор намоянд ва роҳҳои истифодаи донишҳои андӯхтаро дар татбиқи ташаббусҳои инноватсионӣ, иҷтимоӣ ва соҳибкорӣ дар Тоҷикистон баррасӣ кунанд.

Дар матлаби намояндагони ҷавонони Тоҷикистон таъкид шудааст, ки иштироки онҳо дар чунин чорабиниҳои байналмилалӣ на танҳо имконияти муаррифии кишвар, балки масъулияти омӯзиши таҷрибаи пешқадам ва истифодаи он барои рушди ҷомеа мебошад.

Ташкили чунин ҳамоишҳо ба таҳкими робитаҳои ҷавонони кишварҳои ИДМ, густариши ҳамкориҳои минтақавӣ ва пешбурди ташаббусҳои навоварона мусоидат мекунад. Ҷавонони Тоҷикистон низ метавонанд бо дониш, ташаббускорӣ ва масъулияти шаҳрвандӣ дар муаррифии дастовардҳои кишвар ва татбиқи ғояҳои нав саҳми худро гузоранд.

Акс: Иттифоқи ҷавонони Тоҷикистон