Душанбе, 29 сентябр, — АИ «Корвон Иттилоот». 14 октябри соли 2026 шаҳри Душанбе ба майдони муколамаи мустақими миёни давлат, соҳибкорон ва сармоягузорон табдил хоҳад ёфт.

Дар Маҷмааи давлатии «Кохи Ваҳдат» Форуми шарикии давлат ва бахши хусусӣ – 2026 таҳти шиори «Аз муколама то лоиҳаҳои омода барои сармоягузорӣ» баргузор мегардад.

Форуми дарпешистода танҳо ба баррасии масъалаҳои мубрами рӯз маҳдуд нашуда, пеш аз ҳама ба пешбурди амалии ташаббусҳои сармоягузорӣ равона гардидааст.

Созмондиҳандагон ният доранд лоиҳаҳои мушаххас ва имкониятҳои сармоягузориро муаррифӣ намуда, майдоне фароҳам созанд, ки намояндагони сохторҳои давлатӣ, доираҳои соҳибкорӣ, бонкҳо, фондҳои сармоягузорӣ ва ташкилотҳои байналмилалии молиявӣ бевосита масъалаҳои ҳамкорӣ ва механизмҳои татбиқи лоиҳаҳои муштаракро баррасӣ намоянд.

Дар маркази таваҷҷуҳи иштирокдорони форум самтҳое қарор хоҳанд дошт, ки барои навсозии иқтисод ва инфрасохтори Тоҷикистон аҳамияти мустақим доранд. Аз ҷумла, энергетикаи сабз, нақлиёт ва логистика, таъминоти об ва инфрасохтори коммуналӣ, тандурустӣ, маориф ва инфрасохтори рақамӣ.

Бахши алоҳидаи барнома ба муаррифии лоиҳаҳои мушаххас бахшида мешавад. Ҳамчунин, иштирокдорон таҷрибаи кишварҳои минтақа дар самти шарикии давлат ва бахши хусусӣ, роҳҳои ҷалби сармояи хусусӣ ва абзорҳои амалии гузаронидани ташаббусҳои ояндадорро аз марҳилаи ғоя то ба лоиҳаҳои омода барои маблағгузорӣ ва татбиқ баррасӣ хоҳанд кард.

Форум барои доираи васеи ҷонибҳои манфиатдор пешбинӣ шудааст. Дар он соҳибкорон, сармоягузорон, намояндагони бахши молиявӣ ва ташаббускорони лоиҳаҳое, ки ба ҷустуҷӯи имкониятҳои нави ҳамкорӣ ва ҷалби сармоя ба Тоҷикистон манфиатдоранд, ширкат карда метавонанд.

Аҳамияти чунин майдон аз доираи муколамаи танҳо соҳибкорӣ фаротар меравад. Дар шароити идомаи навсозии инфрасохтор ва зарурати ҷалби сармоягузориҳои дарозмуддат, шарикии давлат ва бахши хусусӣ метавонад яке аз механизмҳои муттаҳидсозии захираҳои молиявӣ, таҷрибаи идоракунӣ ва имкониятҳои технологии бахшҳои давлатӣ ва хусусӣ бошад.

Арзиши амалии чунин равиш дар он ифода меёбад, ки масъулият ва хавфҳо миёни ҷонибҳои манфиатдор тақсим шуда, имкони ҷалби манбаъҳои иловагии маблағгузорӣ ва тезонидани татбиқи лоиҳаҳое фароҳам меояд, ки ҳамзамон ба фаъолияти иқтисодӣ, сифати инфрасохтор ва соҳаи иҷтимоӣ таъсир мерасонанд.

Ҳамин тариқ, форуми рӯзи 14 октябр дар «Кохи Ваҳдат» ба пайвастани ғояҳои лоиҳавӣ бо манбаъҳои эҳтимолии маблағгузорӣ ва гузаронидани муколамаи касбӣ ба марҳилаи қабули қарорҳои мушаххаси сармоягузорӣ равона шудааст. Равиши эълоншуда — «аз ғоя то сармоягузорӣ» ва «аз муколама то лоиҳаи воқеӣ» — ба самти амалии шарикии давлат ва бахши хусусӣ ишора мекунад.

АКС: Кумитаи давлатии сармоягузорӣ в  идораи амволи давлатии Ҷумҳурии Тоҷикистон