Душанбе, 18 май, – АИ «Корвон Иттилоот». Дар Тоҷикистон мушкили қаллобии маҷозӣ, ки корҷӯён ва муҳоҷирони кориро ҳадаф қарор медиҳад, рӯ ба афзоиш аст. Тибқи маълумоти Созмони байналмилалии муҳоҷират (МОМ), танҳо дар моҳи март муҳоҷирон ва корҷӯён ба суратҳисобҳои қаллобон беш аз 250 ҳазор сомонӣ интиқол додаанд.

Ҳамзамон, бо муроҷиати шаҳрвандон ба хатти оҷилӣ тавониста шудааст интиқоли зиёда аз 55 ҳазор сомонӣ ба суратҳисобҳои шубҳанок пешгирӣ гардад.

Дар МОМ таъкид мекунанд, ки эълонҳои кор дар шабакаҳои иҷтимоӣ яке аз хатарноктарин каналҳо барои муҳоҷирон ба ҳисоб меравад. Тибқи маълумот, танҳо дар моҳи март 10 нафар пас аз интиқоли маблағ ба маблағи умумии 250 ҳазор сомонӣ ба рақами хатти оҷилӣ (+992 900 800 800) муроҷиат кардаанд. Ҳамзамон 66 корҷӯ пеш аз интиқоли маблағ бо ташкилот тамос гирифта, ба ин васила интиқоли беш аз 55 ҳазор сомонӣ пешгирӣ шудааст.

Яке аз чунин ҳолатҳо бо як сокини 28-солаи шаҳри Панҷакент рух додааст. Ӯ тавассути Telegram эълони кор дар Олмонро пайдо карда, ба шахсони номаълум бовар намуда, 3 ҳазор доллар (беш аз 28 ҳазор сомонӣ) интиқол додааст. Баъдан аз ӯ боз 1000 доллар талаб карда шудааст. Дар ҳамин марҳила ӯ барои санҷиши эълон ба МОМ муроҷиат кардааст. Муайян шудааст, ки саҳифаи пешниҳодкунандаи кор ба қаллобон тааллуқ дорад.

Дар ташкилот таъкид мекунанд, ки дар ҳолати интиқоли маблағ ба суратҳисобҳои номаълум, баргардонидани он қариб ғайриимкон аст. Аз ин рӯ, ба корҷӯён тавсия дода мешавад, ки пеш аз ҳар гуна пардохт ҳатман маълумотро тавассути сохторҳои расмӣ санҷанд.

Танҳо дар се моҳи аввали соли 2026 тавассути хатти оҷилии МОМ зиёда аз 1300 муроҷиат аз Тоҷикистон ва Русия вобаста ба масъалаҳои муҳоҷират ворид шудааст. Бештари муроҷиаткунандагон ба масъалаҳои кори хориҷӣ, шуғли мавсимӣ дар Британияи Кабир, омодагӣ ба муҳоҷират, санҷиши дониши забони русӣ ва гирифтани маълумотномаҳои тиббӣ таваҷҷуҳ зоҳир кардаанд. Ҳамчунин шаҳрвандони Афғонистон низ барои пайвастани оила дар Олмон, сафар ба Канада ва дарёфти марказҳои раводид муроҷиат намудаанд.

Ҳамчунин дар МОМ ҳолати як зан — шаҳрванди Тоҷикистон, ки дар Русия зиндагӣ мекард, зикр гардид. Пас аз муноқишаи оилавӣ ӯ аз кишвар ихроҷ шуда, фарзандонаш дар Русия мондаанд. Айни ҳол Намояндагии Вазорати меҳнат, муҳоҷират ва шуғли аҳолии Тоҷикистон дар Русия дар ҳамкорӣ бо мақомоти дахлдор барои ҳалли масъала ва баргардонидани кӯдакон ба Ватан чораандешӣ мекунад.

Акс: Созмони байналмилалии муҳоҷират (МОМ)