Душанбе, 11 август, – АИ «Корвон Иттилоот».  Аз 2 то 8 август дар шаҳри Остона Олимпиадаи III байналмилалии зеҳни сунъӣ — International Olympiad in Artificial Intelligence (IOAI-2026) баргузор гардид. Тими миллии Тоҷикистон, ки бори аввал дар ин мусобиқаи байналмилалии зеҳнӣ иштирок кард, соҳиби ду медал гардид.

Олимпиада таҳти сарпарастии ЮНЕСКО баргузор шуда, беш аз 500 иштирокчӣ аз 106 кишвари ҷаҳонро ба ҳам овард. Ифтитоҳи расмии мусобиқа бо иштироки Президенти Ҷумҳурии Қазоқистон Қосим-Жомарт Токаев баргузор гардид.

Тоҷикистонро дар ин форуми бонуфузи зеҳнӣ чор хонанда намояндагӣ карданд, ки аз марҳилаи интихобӣ гузашта, омодагии махсус гирифтанд. Ба ҳайати тими миллӣ хонандагони синфи 10-уми мактаби ба номи Абдуфаттоҳ Хотамов Синан Кандиков ва Диловар Икромов, хонандаи синфи 10-уми Литсейи президентӣ барои хонандагони болаёқат Фарангис Ҳаётова ва хатмкардаи ҳамин литсей Муродҷон Хайраков шомил буданд.

Барномаи олимпиада ба истифодаи амалии технологияҳои зеҳни сунъӣ равона шуда буд. Иштирокчиён масъалаҳои мураккабро дар самти омӯзиши мошинӣ ҳал намуда, моделҳои рақамӣ таҳия карданд, барномасозии алгоритмиро истифода бурданд ва бо низомҳои мустақили роботӣ кор карданд.

Барои тими Тоҷикистон иштирок дар IOAI-2026 аввалин таҷрибаи баромад дар чунин сатҳи байналмилалӣ ба ҳисоб меравад. Дар ҳамин ҳол, ба даст овардани ду медал имкон медиҳад, ки ин дебют ҳамчун натиҷаи омодагии ҳадафмандонаи хонандагон ба мусобиқаҳои байналмилалии зеҳнӣ арзёбӣ шавад.

Дар омодагии тим ҳамкории сохторҳои давлатии соҳаи маориф ва бахши технологии ватанӣ нақши муҳим бозид. Ташкили омодагӣ ва дастгирии таълимии тими миллӣ аз ҷониби Вазорати маориф ва илми Ҷумҳурии Тоҷикистон дар ҳамкорӣ бо ширкати технологии zypl.ai таъмин гардид.

Дар доираи барномаи муштарак хонандагон таҳти роҳбарии мутахассисони соҳаи IT курси пуршиддати назариявӣ ва амалиро гузаштанд. Ин формат имкон дод, ки донишҳои академӣ бо малакаҳои амалии истифодаи технологияҳои муосири зеҳни сунъӣ пайваст карда шаванд.

Ду медал дар аввалин иштироки Тоҷикистон дар Олимпиадаи байналмилалии зеҳни сунъӣ аҳамияти бештар аз натиҷаи як мусобиқаро дорад. Ин дастовард нишон медиҳад, ки омода намудани кадрҳои ҷавон дар соҳаи AI тадриҷан ба бахши муҳими рӯзномаи миллии маориф табдил меёбад.

Омезиши имкониятҳои низоми давлатии маориф бо таҷрибаи бахши технологии ватанӣ модели нави омодасозии кадрҳои технологиро ба вуҷуд меорад. Дар дурнамо маҳз чунин ташаббусҳо метавонанд насли мутахассисонеро тарбия намоянд, ки бо зеҳни сунъӣ, платформаҳои рақамӣ ва ҳалли пешрафтаи муҳандисӣ кор карда, иқтидори технологӣ ва рақобатпазирии Тоҷикистонро таҳким мебахшанд.

АКС: Вазорати маориф ва илми Ҷумҳурии Тоҷикистон