Душанбе, 26 май, – АИ «Корвон Иттилоот». Шоми 25 май дар Боғи фарҳангию фароғатии «Наврӯзгоҳ» дар ҳошияи Конфронси чоруми байналмилалии сатҳи баланд оид ба Даҳсолаи байналмилалии амал «Об барои рушди устувор, солҳои 2018–2028» Фестивали об ва барномаи фарҳангӣ таҳти унвони «Об — манбаи ҳаёти инсоният» баргузор гардид.

Ин чорабинӣ на танҳо ҷузъи барномаи расмии конфронс, балки ба як навъ намоишгоҳи зиндаи Тоҷикистон табдил ёфт, ки дар он масъалаи об ҳам ҳамчун захираи стратегии миллӣ, ҳам ҳамчун арзиши фарҳангӣ ва ҳам ҳамчун омили муҳими рушди устувор муаррифӣ шуд.

Дар фестивал муовини Сарвазири Ҷумҳурии Тоҷикистон Дилрабо Мансурӣ, роҳбарияти вазорату идораҳо, намояндагони Мақомоти иҷроияи ҳокимияти давлатии шаҳри Душанбе, иштирокдорони Конфронси байналмилалии об, намояндагони воситаҳои ахбори омма ва дигар меҳмонон иштирок намуданд.

Қисмати намоишгоҳии чорабинӣ таваҷҷуҳи махсусро ба худ ҷалб кард.

Аз ҷониби масъулини шаҳру ноҳияҳои Тоҷикистон ҳунарҳои мардумӣ ва санъати дастӣ, инчунин маҳсулоти саноатӣ ва кишоварзӣ ба намоиш гузошта шуданд. Дар экспозитсия кандакорӣ дар чӯб, ҷавоҳирот, атлас ва адрасбофӣ, сабадбофӣ, ҳунари зардӯзӣ, чакан, гулдӯзӣ, муҳрабофӣ, инчунин хӯрокҳои миллӣ ва меваҳои тару тозаю хушк муаррифӣ гардиданд.

Барои меҳмонон ин намоишгоҳ танҳо шиносоӣ бо маҳсулоти минтақаҳои кишвар набуд, балки ёдоварии зиндае аз он гардид, ки рӯзномаи обӣ мустақиман бо зиндагии мардум, кишоварзӣ, ҳунарҳои мардумӣ, амнияти озуқаворӣ ва иқтисоди маҳаллӣ пайванд дорад. Аз ҳамин ҷиҳат, фестивал ба конфронси обӣ мазмуни васеътарини иҷтимоӣ ва гуманитарӣ бахшид.

Нахуст ҳайати меҳмонон аз намоишгоҳи маҳсулоти кишоварзӣ, ҳунармандӣ ва таомҳои миллӣ дидан намуданд. Ҳамзамон дар доираи фестивал барномаи фарҳангӣ ташкил карда шуд, ки ба чорабинӣ фазои идона бахшид ва таъсири ҷамъиятии онро боз ҳам бештар намуд.

Бояд гуфт, ки Конфронси чоруми байналмилалии сатҳи баланд оид ба Даҳсолаи амал «Об барои рушди устувор, солҳои 2018–2028» аз 25 то 28 май дар шаҳри Душанбе баргузор мешавад. Конфронс бо ташаббуси Ҳукумати Ҷумҳурии Тоҷикистон дар ҳамкорӣ бо Созмони Милали Муттаҳид ва дигар шарикони рушд доир гардида, ба пешбурди ҳадафҳои Даҳсолаи байналмилалии амал оид ба об равона шудааст.

Интизор меравад, ки дар кори конфронс намояндагони сатҳи баланди ҳукуматҳо ва кишварҳои узви СММ, созмонҳои байналмилалию минтақавӣ, ниҳодҳои молиявӣ, муассисаҳои таҳқиқотӣ ва таълимӣ, бахши хусусӣ, созмонҳои ҷамъиятӣ ва ҷомеаи шаҳрвандӣ, инчунин созмонҳои занон, ҷавонон ва кӯдакон иштирок намоянд.

Ҳамзамон иштирокдорони конфронс ба минтақаҳои Тоҷикистон сафар намуда, бо манзараҳои нотакрори табиати кишвар, иншооти сайёҳӣ ва фароғатӣ ва ҳамчунин бо иқтидори обию энергетикии Тоҷикистон аз наздик шинос хоҳанд шуд.

Дар доираи конфронс инчунин намоишгоҳи мавзӯӣ оид ба захираҳои об ташкил карда мешавад, ки дар он имконоти обу энергетикаи Тоҷикистон ва истифодаи захираҳои об барои рушди иқтисодӣ муаррифӣ мегарданд.

Чунин чорабиниҳо бори дигар Тоҷикистонро ҳамчун яке аз кишварҳои дорои иқтидори бузурги обӣ дар Осиёи Марказӣ ва пешсаф дар масъалаҳои об ва тағйирёбии иқлим муаррифӣ менамоянд.

Акс: Маркази матбуоти Вазорати фарҳанги Ҷумҳурии Тоҷикистон