Душанбе, 2 ноябр, – АИ «Корвон Иттилоот». 30 октябр бо ташаббуси Вазорати адлияи Ҷумҳурии Тоҷикистон дар шаҳри Душанбе Форуми XII миллии волоияти қонун баргузор гардид. Чорабинӣ ба муносибати Рӯзи Конститутсияи Ҷумҳурии Тоҷикистон бахшида шуда буд.

Дар кори форум намояндагони Дастгоҳи иҷроияи Президенти Ҷумҳурии Тоҷикистон, Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон, роҳбарият ва кормандони Вазорати адлия, Суди конститутсионӣ, Суди Олӣ ва Суди Олии иқтисодӣ, дигар вазорату идораҳо, ҷомеаи ҳуқуқшиносон, ҷомеаи шаҳрвандӣ ва созмонҳои байналмилалӣ иштирок намуданд.

Ёрдамчии Президенти Ҷумҳурии Тоҷикистон оид ба масъалаҳои ҳуқуқӣ Анвар Сафарзода зикр кард, ки баргузории форум дар бинои нави Вазорати адлия дар соли таҷлили 35-солагии Истиқлоли давлатии кишвар аҳамияти хос дорад. Ба гуфтаи ӯ, Конститутсия асосҳои сохтори давлатдорӣ ва арзишҳои умумибашариро муқаррар намуда, мақомоти ваколатдор вазифадоранд ҳангоми таҳия ва татбиқи қонунҳо онҳоро ба инобат гиранд.

Вазири адлия Музаффар Ашуриён нақши Конститутсияро дар ташаккул ва рушди низоми ҳуқуқии миллӣ, такмили қонунгузорӣ ва фаъолияти ҳуқуқэҷодкунӣ бо назардошти пешрафти иҷтимоию иқтисодии кишвар ва принсипҳои давлати соҳибихтиёр, демократӣ, ҳуқуқбунёд ва иҷтимоӣ таъкид намуд.

Дар ҷараёни форум маърӯзаҳо оид ба се самти асосӣ пешниҳод шуданд: дастрасӣ ба адолати судӣ ва ҳифзи самараноки ҳуқуқи инсон, такмили низоми ёрии ҳуқуқии давлатӣ ва танзими ҳуқуқии рақамикунонӣ дар Ҷумҳурии Тоҷикистон.

Форуми миллӣ аз соли 2015 инҷониб ҳамасола баргузор шуда, ба минбари ҳамкории мақомоти давлатӣ, созмонҳои байналмилалӣ ва ҷомеаи шаҳрвандӣ, баррасии масъалаҳои мубрами ҳуқуқӣ ва таҳияи пешниҳодҳо ҷиҳати такмили қонунгузорӣ табдил ёфтааст.

Дар ҷамъбасти муҳокимаҳо иштирокчиён тавсияҳоеро қабул карданд, ки ба таҳкими волоияти қонун, таъмини баробарии шаҳрвандон дар назди қонун ва бартараф намудани мушкилоти монеъшаванда ба рушди минбаъдаи низоми ҳуқуқӣ равона шудаанд. Ин ҳуҷҷат барои баррасӣ ва татбиқи амалӣ ба мақомоти дахлдор ирсол карда мешавад.

Акс: АМИТ «Ховар».