Душанбе, 15 апрел, – АИ «Корвон Иттилоот». Муҳоҷирони меҳнатии тоҷик, ки ният доранд ба Русия сафар кунанд, метавонанд пешакӣ дар намояндагии КВД-и федералии «Хадамоти шиносномавӣ-раводидӣ»-и ВКД Россия дар Душанбе, воқеъ дар кӯчаи Айнӣ, 121, дар бинои Хадамоти муҳоҷират, санҷиш гузаранд. Дар он ҷо дактилоскопия, муоинаи тиббӣ ва санҷиши мавҷуд ё набудани маҳдудият барои ворид шудан ба Федератсияи Русия анҷом дода мешавад.

Ба иттилои манбаъҳо, чунин тартиб имкон медиҳад, ки тамоми расмиёти асосӣ ҳанӯз дар Тоҷикистон анҷом ёбанд ва ҳамин тавр вақти сарфшуда ҳангоми гузаштани марзи Русия кам гардад. Инчунин ба муҳоҷирон тавсия дода мешавад, ки пешакӣ тавассути замимаи мобилии RuID ариза пешниҳод карда, QR-коди заруриро гиранд, ки дар тартиби воридшавии шаҳрвандони хориҷӣ ба Русия истифода мешавад.

Тавре дар маводи марбута таъкид мешавад, анҷом додани ҳамаи расмиёти зарурӣ дар Тоҷикистон бояд ба сафар ва будубоши қонунӣ, бехатар ва устувор дар Русия мусоидат кунад. Дар манбаъҳои пешина ҳам гуфта мешуд, ки санҷиши пешакӣ дар Душанбе муҳоҷирро аз бақайдгирии такрорӣ дар Русия озод месозад.

Асоси ҳуқуқии ин раванд пас аз имзои протоколи ислоҳ ба созишномаи байниҳукуматӣ дар соли 2025 шакл гирифт. Яъне сухан аз як модели нисбатан нави ҳамкорӣ меравад, ки дар он муҳоҷир пеш аз сафар санҷишро дар ватан мегузарад, ва корфармои русӣ имкон пайдо мекунад, ки ҷалби ӯро дар чорчӯби муташаккил ва равшантар ба роҳ монад.

 Акс: https://mvdmedia.ru, Ифтитоҳи намояндагии КВД федералии «Хадамоти шиносномавӣ-раводидӣ»-и ВКД Россия дар Душанбе (аз бойгонӣ)