Душанбе, 04 июн, – АИ «Корвон Иттилоот». Дар пойтахти Тоҷикистон барои шаҳрвандони ҷумҳурӣ курсҳои омӯзишии ройгон оид ба омодагӣ ба имтиҳон аз забони русӣ, таърих ва қонунгузории Федератсияи Русия ташкил карда шудаанд. Ин ташаббус ба дастгирии муҳоҷирони меҳнатие равона гардидааст, ки барои кор ё иқомат ба Русия сафар кардан мехоҳанд.

Машғулиятҳо аз ҷониби Муассисаи давлатии «Марказҳои машваратӣ ва омодасозии пеш аз сафар барои муҳоҷирони меҳнатӣ»-и Хадамоти муҳоҷирати кишвар баргузор мешаванд. Дарсҳоро мутахассисони марказ мегузаронанд, ки ба иштирокчиён барои мукаммал намудани дониш ва омодагии беҳтар ба талаботи имтиҳонӣ мусоидат менамоянд.

Тавре масъулин хабар медиҳанд, машғулиятҳо рӯзҳои сешанбе ва панҷшанбе аз соати 09:00 то 12:00 баргузор мегарданд. Барои иштирок танҳо пешниҳоди шиноснома зарур аст. Таълим пурра ройгон буда, барои доираи васеи шаҳрвандоне, ки ба омодагии босифат ва қонунии сафар ба хориҷ манфиатдоранд, дастрас мебошад.

Суроғаи баргузории курсҳо: шаҳри Душанбе, кӯчаи Айнӣ, 121 (минтақаи ДОК). Барои гирифтани маълумоти иловагӣ ва бақайдгирӣ шаҳрвандон метавонанд ба рақами 225 05 75 муроҷиат намоянд.

Коршиносон бар ин назаранд, ки чунин ташаббусҳо на танҳо аҳамияти амалӣ, балки арзиши иҷтимоӣ низ доранд. Омодагӣ ба имтиҳон аз забони русӣ, таърих ва қонунгузории Русия барои муҳоҷирон марҳилаи муҳими мутобиқшавӣ ба ҳисоб рафта, ба баланд гардидани сатҳи саводи забонӣ ва ҳуқуқии онҳо мусоидат мекунад.

Дар шароите, ки муҳоҷирати меҳнатӣ ҳамоно яке аз омилҳои муҳими ҳаёти иҷтимоӣ ва иқтисодии кишвар боқӣ мемонад, чунин курсҳо ба шаҳрвандон имконият медиҳанд, ки бо талаботи кишвари қабулкунанда беҳтар ошно гардида, хавфҳои вобаста ба омодагии нокифояро коҳиш диҳанд.

Акс: Вазорати меҳнат, муҳоҷират ва шуғли аҳолии Ҷумҳурии Тоҷикистон