Душанбе, 8 октябр, – АИ «Корвон Иттилоот» . Дар машқгоҳи кӯҳии «Ляур»-и Тоҷикистон тамрини муштараки Қувваҳои Мусаллаҳи Федератсияи Русия ва Ҷумҳурии Тоҷикистон ба анҷом расид. Дар ҷараёни машқ низомиёни ду кишвар амалиёти муштараки муҳосира ва озод намудани маҳалли аҳолинишинро, ки тибқи сенария аз ҷониби душмани шартӣ ишғол шуда буд, анҷом доданд.

Қисмати амалии машқ ҳамоҳангсозии воситаҳои анъанавии оташфишонӣ бо низомҳои бесарнишин ва комплексҳои роботиро нишон дод.

Тибқи сенарияи машқ, душмани шартӣ ғайриқонунӣ сарҳади давлатиро убур карда, як маҳалли аҳолинишинро ишғол намуд ва бо ҳадафи афзоиши неруҳо ва пешравӣ ба самти ноҳияҳои марказии ҷумҳурӣ кӯшиши густариши мавқеи худро кард. Барои пешгирӣ аз идомаи пешравии он фармондеҳӣ қарор қабул намуд, ки неруҳои муштарак ба кор ҷалб карда шаванд.

Дар ҷараёни амалиёти амалӣ ба мавқеъҳои душмани шартӣ зарбаи мураккаби оташфишонӣ расонида шуд. Минтақаи маҳалли аҳолинишини ишғолшуда аз ҷониби экипажҳои зиреҳпӯшҳои БТР-82А муҳосира гардид. Пеш аз ҳаракати гурӯҳҳои ҳамлавар омодагии артиллерӣ гузаронида шуд.

Ҳамзамон, экипажҳои чархболҳои Ми-24 корвони техникаи сабукзиреҳпӯши душмани шартиро бо мушакҳои идоранашавандаи авиатсионӣ ва оташи тӯпҳои авиатсионии 30-мм-и ГШ-2-30 мавриди зарба қарор доданд. Экипажҳои танкҳои Т-72Б3М низ аз мавқеъҳои оташфишонии пӯшида ба воҳидҳои заминӣ дастгирии оташфишонӣ расониданд.

Пас аз омодагии оташфишонӣ гурӯҳҳои ҳамлавар бо истифода аз квадросиклҳо ба минтақаи ҷамъшавии душмани шартӣ пеш рафтанд. Ҳаракати онҳо бо дастгирии комплексҳои роботии заминии «Курьер» ва операторони дронҳои FPV таъмин гардид.

Низомиён амалиёти ҳамла ба хандақҳо ва биноҳоро иҷро намуда, малакаҳои тирпарронии тактикии артишӣ, ҳаракат дар ҳайати ҷуфтҳои ҷангӣ, пӯшиши оташфишонӣ ва дигар усулҳои тактикиро, ки барои амал дар шароити маҳдуд ва релефи мураккаб заруранд, такмил доданд.

Пас аз «ишғол» ва озод намудани маҳалли аҳолинишин низомиён вазифаҳои вобаста ба супоридани мавқеъҳои ишғолшуда ба воҳидҳои таҳкимбахш ва расонидани зарбаи оташфишонӣ ба гурӯҳҳои ақибнишинандаи душмани шартиро иҷро карданд.

Дар ҷараёни амалиёти ҳамлаварӣ нақши муҳимро воҳидҳои низоми бесарнишин иҷро намуданд. Операторони ҳавопаймоҳои бесарнишини иктишофӣ вазъи минтақаи амалиётро назорат карда, ҳаракати гурӯҳҳои ҳамлаварро ислоҳ ва назорати нобудсозии ҳадафҳои муайяншударо анҷом доданд. Ба ин тартиб, воситаҳои бесарнишин назорати иттилоотии пайвастаи амалиёти заминиро таъмин карданд.

Дар ҷараёни намоиши амалии машқ ба истифодаи комплексҳои роботӣ таваҷҷуҳи махсус зоҳир гардид. Комплексҳои роботии заминии «Курьер» на танҳо барои расонидани зарбаи оташфишонӣ ба душмани шартӣ, балки барои иҷрои вазифаҳои таъминотӣ — интиқоли лавозимоти ҷангӣ ва эвакуатсияи низомиёни шартан маҷрӯҳ — истифода шуданд. Ин тарзи истифодаи техника имкони ҳамзамон иҷро намудани вазифаҳои ҷангӣ ва ёрирасонро нишон дод.

Қисмати амалии машқ марҳилаи ҷамъбастии тамринҳо гардид, ки дар доираи он масъалаҳои ҳамкории воҳидҳои низомии ду кишвар ҳангоми иҷрои вазифаҳо дар минтақаи наздисарҳадӣ такмил дода шуданд. Машқи муҳосираи маҳалли аҳолинишин, амалиёт дар минтақаи кушод ва ҳамла ба иншоот ба низомиён имкон дод, ки ҳамоҳангии байни намудҳо ва навъҳои гуногуни қӯшунҳоро бештар такмил диҳанд.

Бо маросими тантанавии пӯшидашавии тамрини муштарак чорабинӣ ба анҷом расид. Дар майдони сафороии урдугоҳи саҳроӣ ба иштирокчиёни фаъолтарини машқ медалҳои соҳавии ду кишвар, ифтихорномаҳо ва туҳфаҳои арзишманд супорида шуданд. Пас аз маросим низомиён таҳти ҳамроҳии мусиқии оркестри ҳарбӣ бо қадамзании тантанавӣ аз майдон гузаштанд.

Тамрини муштараки Қувваҳои Мусаллаҳи Федератсияи Русия ва Ҷумҳурии Тоҷикистон аз 28 сентябр то 2 октябри соли 2026 дар машқгоҳи «Ляур»-и Тоҷикистон баргузор гардид. Ҳадафҳои асосии он такмили амалиёти муштараки контингентҳои низомӣ, баланд бардоштани малакаҳо ҳангоми иҷрои вазифаҳои таълимию ҷангӣ ва таҳкими ҳамкории ҳарбӣ буданд.

Дар доираи машқ масъалаҳои муҳосираи маҳалли аҳолинишин, амал дар минтақаи наздисарҳадӣ, инчунин гузаронидани амалиёти ҳамлаварӣ дар маҳалли аҳолинишин ва минтақаҳои кушод машқ карда шуданд.

Дар Тоҷикистон Пойгоҳи ҳарбии гвардиявии 201-уми Русия — бузургтарин иншооти низомии Русия дар хориҷ аз кишвар — ҷойгир шудааст. Пойгоҳ дар ду шаҳр — Душанбе ва Бохтар — қарор дошта, аз воҳидҳои тирандози моторӣ, танкӣ, артиллерӣ, иктишофӣ, инчунин воҳидҳои мудофиаи зиддиҳавоӣ, ҳифзи радиатсионӣ, химиявӣ ва биологӣ ва алоқа иборат мебошад.

АКС: Шуъбаи ҳамкории ҳарбию шаҳрвандии Пойгоҳи ҳарбии 201-уми Русия