Душанбе, 10 август, – АИ «Корвон Иттилоот». Дар бинои КВД «Маркази рақамикунонӣ, инноватсия ва такмили ихтисоси кадрҳои соҳаи кишоварзӣ»-и Вазорати кишоварзии Ҷумҳурии Тоҷикистон ҷаласаи ғайринавбатии кумитаи роҳбарикунандаи лоиҳаи «Ҷалб намудани ҷавонони хоҷагиҳои фермерии хурд тавассути истифода намудани технологияи кишоварзӣ барои беҳтар намудани амнияти озуқаворӣ ва занҷираҳои арзиши маҳсулот» баргузор гардид.

Ҷаласа таҳти роҳбарии муовини вазири кишоварзии Ҷумҳурии Тоҷикистон Н. Анварӣ ва директори Барномаи озуқавории ҷаҳонӣ дар Тоҷикистон Саймон Холлем доир шуд.

Дар он роҳбарият ва намояндагони Вазорати кишоварзии Ҷумҳурии Тоҷикистон, Агентии инноватсия ва технологияҳои рақамӣ, Кумитаи бехатарии озуқаворӣ, Кумитаи кор бо ҷавонон ва варзиш, Кумитаи таҳсилоти ибтидоӣ ва миёнаи касбӣ, КВД «Маркази рақамикунонӣ, инноватсия ва такмили ихтисоси кадрҳои соҳаи кишоварзӣ», Академияи илмҳои кишоварзии Тоҷикистон, Донишгоҳи аграрии Тоҷикистон ба номи Ш. Шоҳтемур, Барномаи озуқавории ҷаҳонӣ дар Тоҷикистон (WFP), Агентии Корея оид ба ҳамкориҳои байналмилалӣ дар Тоҷикистон (KOICA), Ташкилоти «Каритас», Кооперативи «Сароб» ва дигар намояндагони бахши хусусӣ ширкат варзиданд.

Дар меҳвари муҳокима масъалаҳои марбут ба пешрафт дар татбиқи консепсияи насби киоскҳои рақамии кишоварзӣ барои паҳн кардани хизматрасониҳо дар соҳаи кишоварзӣ қарор доштанд. Иштирокчиён ҳамчунин зарурати мувофиқа кардани равиши ягона барои устуворӣ ва фаъолияти доимии ин киоскҳоро баррасӣ намуданд.

Дар ҷаласа муаррифии интерфейс ва мундариҷаи киоскҳои рақамии кишоварзӣ, инчунин принсипи кори система, намудҳои хизматрасонӣ, имкониятҳо ва афзалиятҳои он мавриди омӯзиш ва муҳокима қарор гирифт. Ба андешаи иштирокчиён, чунин формат метавонад дастрасии деҳқонон ва ҷавонони деҳотро ба маълумоти муосири аграрӣ, машваратҳо ва хизматрасониҳои зарурӣ осон гардонад.

Таъкид шуд, ки киоскҳои рақамии кишоварзӣ метавонанд ба як унсури муҳими навсозии бахши аграрӣ табдил ёбанд. Онҳо барои хоҷагиҳои фермерии хурд имкони беҳтари гирифтани маълумоти амалӣ, баланд бардоштани савияи рақамӣ ва истифодаи самараноки технологияҳои муосирро фароҳам меоранд.

Иштирокчиёни ҷаласа омодагии худро ҷиҳати ҳамкории зич дар тамоми марҳилаҳои татбиқи лоиҳа таъкид намуда, изҳор доштанд, ки танҳо бо ҳамоҳангии сохторҳои давлатӣ, шарикони байналмилалӣ ва бахши хусусӣ метавон устувории амалии ташаббус ва таъсири дарозмуддати онро таъмин намуд.

Лоиҳаи киоскҳои рақамии кишоварзӣ яке аз самтҳои умедбахши тағйироти аграрӣ дар Тоҷикистонро инъикос мекунад — пайвастани кишоварзӣ, технологияҳои рақамӣ ва сиёсати ҷавонон.

Мавзӯъ танҳо ба таъсиси як канали нави хизматрасонӣ маҳдуд намешавад, балки ба ташаккули инфрасохтори муосири дониш ишора мекунад, ки метавонад рақобатпазирии хоҷагиҳои фермерии хурдро боло барад, дастрасӣ ба машваратҳои агрономиро васеъ намояд ва ба таҳкими амнияти озуқавории кишвар мусоидат кунад. Ҷалби ҷавонон ба чунин ташаббусҳо махсусан муҳим аст, зеро маҳз насли нав ба қувваи асосии тағйироти технологӣ дар деҳот табдил меёбад.

АКС: Маркази рақамикунонӣ,инноватсия ва такмили ихтисоси кадрҳои соҳаи кишоварзӣ