Душанбе, 02 июн, – АИ «Корвон Иттилоот». Пойтахти Тоҷикистон ба яке аз бузургтарин рӯйдодҳои фарҳангӣ ва сайёҳии соли ҷорӣ омодагӣ мебинад. Рӯзҳои 22–23 августи соли 2026 дар Муассисаи давлатии «Наврӯзгоҳ» Фестивали тобистонаи Душанбе – 2026 (Dushanbe Summer Fest – 2026), ки ба 35-солагии Истиқлолияти давлатии Ҷумҳурии Тоҷикистон бахшида шудааст, баргузор мегардад.

Қарори дахлдор аз ҷониби Раиси шаҳри Душанбе ба имзо расидааст. Тавре шуъбаи рушди сайёҳии Мақомоти иҷроияи ҳокимияти давлатии шаҳри Душанбе хабар медиҳад, ташкили фестивал ба зиммаи ҶДММ «Бозоршинос» («Ҳаматарафа») гузошта шуда, он бо дастгирии мақомоти шаҳр баргузор мешавад.

Ин чорабинии бузург на танҳо ҳамчун ҷашни фарҳангӣ, балки ҳамчун бахше аз сиёсати пешбурди имкониятҳои сайёҳӣ, фарҳангӣ ва иқтисодии пойтахт арзёбӣ мегардад. Дар солҳои охир Душанбе тадриҷан мавқеи худро ҳамчун яке аз марказҳои ҷолиби сайёҳии Осиёи Марказӣ таҳким бахшида, ба рушди сайёҳии рӯйдодӣ аҳамияти махсус медиҳад.

Ҳадафҳои асосии фестивал рушди соҳаи сайёҳӣ, фароҳам овардани имкониятҳои нави фароғатӣ барои сокинону меҳмонони пойтахт, ҷалби бештари сайёҳони хориҷӣ, муаррифии имкониятҳои фарҳангӣ ва сайёҳии Душанбе ва дастгирии ташаббусҳои бахши хусусӣ арзёбӣ мешаванд.

Барномаи фестивал яке аз пурмуҳтавотарин барномаҳои солҳои охир хоҳад буд. Барои меҳмонон намоиш ва фурӯши ҳунарҳои мардумӣ, ярмаркаҳои таомҳои миллӣ ва байналмилалӣ, маҳсулоти истеҳсолкунандагони ватанӣ ва даҳҳо майдончаҳои фарҳангӣ ва фароғатӣ ташкил карда мешаванд.

Таваҷҷуҳи махсус ба истироҳати оилавӣ равона мегардад. Дар доираи фестивал бозиҳои варзишӣ ва зеҳнӣ, озмунҳо, викторинаҳо, намоишҳои театрӣ ва сиркӣ, сайру гашт бо асп ва дигар чорабиниҳои интерактивӣ барои кӯдакону калонсолон баргузор хоҳанд шуд.

Қуллаи асосии чорабинӣ консерти бузурги идона бо иштироки ситораҳои маъруфи эстрадаи тоҷик ва ҳунармандони хориҷӣ хоҳад буд. Интизор меравад, ки барномаи консертӣ ба яке аз муҳимтарин рӯйдодҳои мусиқии тобистони соли 2026 табдил ёбад.

Тибқи қарор, ҳайати Кумитаи тадорукот ва нақшаи чорабиниҳои омодагӣ аллакай тасдиқ шудаанд. Ба сохторҳои дахлдори шаҳрӣ супориш дода шудааст, ки амният, хизматрасонӣ, дастрасии нақлиётӣ ва сатҳи баланди ташкили фестивалро таъмин намоянд.

Ҳамоҳангсозии корҳои омодагӣ ба зиммаи шуъбаи рушди сайёҳии Мақомоти иҷроияи ҳокимияти давлатии шаҳри Душанбе вогузор шудааст.

Бозгашти фестивал аҳамияти рамзӣ низ дорад. Dushanbe Summer Fest дар солҳои 2018, 2019 ва 2021 баргузор гардида, ба яке аз брендҳои маъруфи фарҳангии пойтахт табдил ёфтааст. Ҳар дафъа он ҳазорҳо сокинон, меҳмонони шаҳр ва сайёҳони хориҷиро ба худ ҷалб мекард.

Таҷрибаи солҳои гузашта нишон дод, ки чунин чорабиниҳо ба рушди соҳибкории хурду миёна, бахши меҳмоннавозӣ, хизматрасонӣ, ҳунармандӣ ва иқтисоди эҷодӣ таъсири мусбат мерасонанд. Ҳамзамон онҳо ба муаррифии фарҳанги миллӣ ва таҳкими нуфузи байналмилалии Душанбе мусоидат мекунанд.

Дар соли таҷлили 35-солагии Истиқлолияти давлатӣ фестивал аҳамияти боз ҳам бештар пайдо намуда, ҳамчун майдони муаррифии дастовардҳои Тоҷикистони муосир, гуногунрангии фарҳангӣ ва имкониятҳои рӯзафзуни сайёҳии кишвар хизмат хоҳад кард.

Акс: Шуъбаи рушди сайёҳии Мақомоти иҷроияи ҳокимияти давлатии шаҳри Душанбе