Душанбе, 04 июн, – АИ «Корвон Иттилоот». Рӯзҳои 17–18 июн дар шаҳри Душанбе Фестивали бузурги фарҳангии Корея — Тоҷикистон баргузор мегардад, ки аз ҷониби Сафорати Ҷумҳурии Корея дар Тоҷикистон ташкил шудааст. Чорабинӣ дар майдони 800-солагии Москва, назди Театри давлатии академии опера ва балети ба номи Садриддин Айнӣ доир мешавад ва ба ҳамкориҳои фарҳангӣ миёни ду кишвар такони нав хоҳад бахшид.
Тибқи иттилои намояндагии дипломатии Корея, фестивал ба муносибати Саммити нахустини «Ҷумҳурии Корея + Осиёи Марказӣ» ва инчунин саммити «Ҷумҳурии Корея ва Ҷумҳурии Тоҷикистон», ки моҳи сентябр дар шаҳри Сеул баргузор мешаванд, бахшида шудааст. Ин замина ба чорабинӣ аҳамияти на танҳо фарҳангӣ, балки сиёсиву дипломатӣ низ медиҳад.
Барномаи фестивал 17 июн соати 18:30 бо маросими ифтитоҳ ва финали озмуни K-Pop оғоз мешавад. Дар он ҷавонони тоҷик бо иҷрои рақсу сурудҳо бар асоси композитсияҳои маъруфи кореягӣ ҳунари худро ба намоиш мегузоранд. Барандаи озмун имкони пешниҳод кардани дархост барои иштирок дар марҳилаи ҷаҳонии фестивали байналмилалии K-Pop World Festival дар Кореяи Ҷанубиро пайдо мекунад.
Рӯзи 18 июн соати 18:30 консерти муштараки ҳунармандони кореягӣ ва тоҷик баргузор хоҳад шуд. Дар ҳайати ҳайати ҳунарии Корея ҳам чеҳраҳои муосири эстрадӣ ва ҳам устодони сурудхонии анъанавӣ, инчунин гурӯҳи самулнори — иҷрои мусиқии миллӣ бо асбобҳои зарбӣ — ҳузур хоҳанд дошт.
Илова бар барномаҳои саҳнавӣ, рӯзҳои 17 ва 18 июн аз соати 14:00 то 18:00 павильонҳои мавзӯӣ ва гӯшаҳои интерактивӣ ба фаъолият оғоз мекунанд. Меҳмонон метавонанд бо бозиҳои суннатии кореягӣ, имкониятҳои сайёҳии Кореяи Ҷанубӣ, филму сериалҳо, ҷаҳони K-Pop ва K-Beauty, инчунин таомҳои миллӣ шинос шаванд.
Ба иттилои ташкилкунандагон, 20 июн соати 18:30 консерти фарҳанги кореягӣ бори аввал дар шаҳри Хуҷанд низ баргузор мешавад. Ин иқдом ҳамчун оғози марҳилаи нави муаррифии фарҳанги Корея дар минтақа арзёбӣ мегардад.
Коршиносон чунин чорабиниҳоро на танҳо майдони муаррифии санъат ва эҷод, балки воситаи тақвияти ҳамдигарфаҳмӣ байни халқҳо мешуморанд. Дар шароите, ки робитаҳои Тоҷикистон бо давлатҳои Осиёи Шарқӣ ва Ҷанубӣ тадриҷан густариш меёбанд, чунин фестивалҳо ба таҳкими пули фарҳангӣ ва рушди дипломатияи халқҳо мусоидат мекунанд.
Акс: аввалин фестивали K-Pop дар Душанбе, asia+