Душанбе, 02 июн 2026г. – АИ «Корвон Иттилоот». Дар шаҳри Хуҷанд мавсими нави оббозӣ расман оғоз гардида, шиногоҳи соҳили чапи дарёи Сир пас аз омодасозии пурра ба истифода дода шуд. Мақомоти вилояти Суғд таъкид мекунанд, ки дар баробари фароҳамсозии шароити истироҳатӣ, масъалаи амнияти шаҳрвандон дар маркази таваҷҷуҳ қарор дорад.

Зимни шиносоӣ бо вазъи шиногоҳ, Раиси вилояти Суғд Раҷаб Аҳмадзода изҳор дошт, ки бо фаро расидани мавсими тобистон ва афзоиши ҳарорат, сокинон бештар аз минтақаҳои фароғатӣ ва соҳилӣ истифода мебаранд. Дар ин замина, инфрасохтори шиногоҳи дарёи Сир пурра омода гардида, барои истироҳати бехатар ва муосири аҳолӣ шароити зарурӣ муҳайё шудааст.

Ба иттилои масъулин, дар мавсими оббозӣ назорати бехатарӣ таҳти ҳамоҳангии доимӣ қарор дошта, хадамоти наҷотдиҳӣ дар ҳолати омодабош фаъолият мекунад. Дар ҷараёни боздид, Раиси вилоят ба масъулини Раёсати Кумитаи ҳолатҳои фавқулода ва мудофиаи гражданӣ дар шаҳри Хуҷанд дастур дод, ки барои расонидани кӯмаки фаврӣ ба шаҳрвандон, махсусан ба наврасон ва шахсони камтаҷриба дар оббозӣ, тадбирҳои иловагӣ андешанд.

Иттилоъ дода шуд, ки бахши наҷотдиҳӣ бо техника ва таҷҳизоти муосир, аз ҷумла заврақҳои моторӣ ва резинӣ, гидросиклҳо, киштиҳои патрулӣ ва воситаҳои махсуси наҷотдиҳӣ таъмин мебошад. Ҳамарӯза 10 нафар наҷотдиҳандагони касбӣ тибқи ҷадвали навбатдорӣ фаъолият мекунанд.

Шиногоҳи соҳили дарёи Сир бо дарназардошти талаботи муосир бунёд ва таҷдид гардида, ҳамчун макони истироҳати сокинон ва меҳмонони дохиливу хориҷӣ пешбинӣ шудааст. Дар он ҳавзҳои сунъӣ барои кӯдакон, майдонҳои варзишӣ, аз ҷумла волейбол ва тенниси рӯи миз, инчунин гӯшаҳои фароғатӣ фаъолият мекунанд.

Ҳамзамон дар ҳудуди шиногоҳ инфрасохтори хизматрасонӣ — соябонҳо, ҳуҷраҳои ивазкунии либос ва дигар шароити зарурии маишӣ барои истироҳати шаҳрвандон омода гардидааст.

Дар доираи боздид, Раиси вилояти Суғд наврасонро ба муносибати Рӯзи байналмилалии ҳифзи кӯдакон табрик гуфта, ба онҳо туҳфаҳои хотиравӣ тақдим намуд.

АКС: Хадамоти матбуоти Раиси вилояти Суғд