Душанбе, 08 сентябр, – АИ «Корвон Иттилоот». Субҳи 7 сентябр дар шаҳри Бохтар — маркази маъмурии вилояти Хатлон — ба ифтихори 35-солагии Истиқлоли давлатии Ҷумҳурии Тоҷикистон гузашти низомӣ баргузор гардид.

Ин чорабинии тантанавӣ намоиши омодагии касбӣ, интизоми ҳарбӣ ва омодагии муҳофизони Ватан барои таъмини амнияти давлат ва зиндагии осоиштаи мардум гардид.

Дар гузашти низомӣ хизматчиёни ҳарбии Қувваҳои Мусаллаҳи Ҷумҳурии Тоҷикистон, ҳайати шахсии мақомоти ҳифзи ҳуқуқ ва афсарону сарбозони захираҳои сафарбарии вилоят иштирок намуданд. Онҳо ҳамчун муҳофизони истиқлоли давлатӣ, марзу буми Ватан, қонуният ва тартиботи ҷамъиятӣ аз назди иштирокчиёни чорабинӣ гузаштанд.

Дар ҳамоиши тантанавӣ раиси вилояти Хатлон Давлаталӣ Саид сокинони вилоят, хизматчиёни ҳарбӣ, кормандони мақомоти ҳифзи ҳуқуқ ва ҳайати захираҳои сафарбариро ба муносибати 35-солагии Истиқлоли давлатӣ табрик намуда, ба хонадони сокинон файзу баракат, саломатӣ, осоиш ва ба Тоҷикистон пешрафту шукуфоии рӯзафзун орзу кард.

Раиси вилоят зимни суханронӣ таъкид намуд, ки суботи давлат, амнияти ҷомеа ва эътимоди мардум ба фардои осоишта ба иқтидори мудофиавии кишвар ва қудратмандии Қувваҳои Мусаллаҳ робитаи мустақим дорад.

«Қувваҳои Мусаллаҳи мамлакат зодаи даврони Истиқлоли давлатӣ мебошанд. Раванди таъсис ва ташаккули онҳо ба марҳалаи ниҳоят мураккаби ибтидои соҳибистиқлолӣ рост омад», — изҳор дошт Давлаталӣ Саид.

Ба таъкиди ӯ, Қувваҳои Мусаллаҳи Тоҷикистон дар тӯли солҳои истиқлол роҳи душвори ташаккулро тай намуда, бо вуҷуди мушкилоти ҷиддӣ ба яке аз такягоҳҳои муҳими давлат ва сипари боэътимоди мамлакат табдил ёфтанд.

Дар ин раванд нақши Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳ муҳтарам Эмомалӣ Раҳмон махсус таъкид гардид. Тибқи гуфтаи раиси вилоят, таваҷҷуҳи пайвастаи роҳбарияти давлат ба соҳаи мудофиа боиси тағйироти назаррас, беҳтар гардидани шароити хизмат ва таҳкими имкониятҳои ҷузъу томҳои низомӣ шудааст.

Дар шароити таҳдидҳои муосир риояи қатъии интизоми ҳарбӣ, талаботи ойинномаҳо, садоқат ба савганди ҳарбӣ ва давлат аз ҷумлаи принсипҳои асосии хизмати ҳарбӣ арзёбӣ гардид.

Давлаталӣ Саид ҳамчунин зикр намуд, ки дар даврони истиқлолият дар ҳудуди вилояти Хатлон низоми зарурии сохторҳои низомӣ ва мақомоти ҳифзи ҳуқуқ ташаккул ёфтааст. Ин сохторҳо дар самти муқовимат ба терроризм, экстремизм, гурӯҳҳои мусаллаҳи ғайриқонунӣ ва дигар таҳдидҳои амниятӣ вазифаҳои муҳимро иҷро мекунанд.

Таҳкими заминаи моддию техникии қисмҳои низомӣ низ яке аз самтҳои муҳими ин раванд боқӣ мемонад. Тибқи дастурҳои Сарфармондеҳи Олӣ, шароити хизмат дар қисмҳои низомӣ ва дидбонгоҳҳои сарҳадии вилояти Хатлон сол ба сол беҳтар мегардад.

Бо дастгирии Мақомоти иҷроияи ҳокимияти давлатии вилоят, шаҳру ноҳияҳо, соҳибкорони ватандӯст ва шахсони саховатпеша корҳои таъмиру азнавсозӣ идома дошта, қисмҳои низомӣ ва шаҳрчаҳои ҳарбӣ тадриҷан ба талаботи муосир мутобиқ карда мешаванд.

Барои вилояти Хатлон, ки дар низоми умумии амнияти кишвар мавқеи муҳим дорад, чунин тадбирҳо аҳаммияти на танҳо амалӣ, балки стратегӣ низ доранд. Артиши муосир ва сохторҳои самараноки ҳифзи ҳуқуқ яке аз шартҳои асосии ҳифзи истиқлол, суботи ҷомеа ва фароҳам овардани замина барои рушди минбаъдаи иҷтимоиву иқтисодии кишвар мебошанд.

АКС: Мақомоти иҷроияи хокимияти давлатии вилояти Хатлон