Душанбе, 16 сентябр, – АИ «Корвон Иттилоот». Президенти Ҷумҳурии Тоҷикистон Эмомалӣ Раҳмон бо сафари расмӣ ба шаҳри Сеул омад, то дар нахустин ҳамоиши «Осиёи Марказӣ — Ҷумҳурии Корея» иштирок намояд.

Дар ин ҳамоиш роҳбарони кишварҳои Осиёи Марказӣ ва Ҷумҳурии Корея масъалаҳои густариши муколамаи сиёсӣ ва рушди ҳамкории амалӣ миёни кишварҳои минтақа ва яке аз марказҳои пешрафтаи иқтисодию технологии Осиёро баррасӣ хоҳанд кард.

Дар фурудгоҳи байналмилалии Сеул ба истиқболи Сарвари давлати Тоҷикистон горди фахрӣ саф орост. Ҳудуди фурудгоҳ бо парчамҳои давлатии Ҷумҳурии Тоҷикистон ва Ҷумҳурии Корея оро дода шуда буд, ки аз сатҳи баланди сафари расмӣ ва аҳамияти робитаҳои дарпешистода шаҳодат медиҳад.

Иштироки Эмомалӣ Раҳмон дар ҳамоиш дар заминаи густариши ҳамкории Тоҷикистон бо Ҷумҳурии Корея ва таҳкими робитаҳои кишварҳои Осиёи Марказӣ бо Сеул сурат мегирад. Формати «Осиёи Марказӣ — Ҷумҳурии Корея» имкони муҳими баррасии на танҳо масъалаҳои сиёсӣ ва иқтисодӣ, балки ҳамкории сармоягузорӣ, саноат, рақамикунонӣ, нақлиёт, энергетика, маориф ва технологияҳои навро фароҳам меорад.

Барои Тоҷикистон самти Корея аз лиҳози ҷалби сармоя, ворид намудани технологияҳои муосир ва густариши шарикии иқтисодӣ аҳамияти хос дорад.

Дар шароити тағйироти босуръати иқтисодии Осиёи Марказӣ ҳамкорӣ бо Ҷумҳурии Корея ҳамчун кишвари дорои иқтидори баланди технологӣ метавонад барои татбиқи лоиҳаҳои нав дар самти навсозии инфрасохтор, рушди сармояи инсонӣ ва баланд бардоштани рақобатпазирии иқтисоди миллӣ замина фароҳам созад.

Мулоқотҳои дарпешистода ҳамчунин барои Тоҷикистон имконият фароҳам меоранд, ки мавқеъ ва афзалиятҳои худро дар доираи ҳамкории минтақавӣ муаррифӣ намуда, самтҳои нави ҳамкориро бо сохторҳои давлатии Корея ва доираҳои соҳибкории ин кишвар муайян намояд.

Худи баргузории нахустин ҳамоиш аз афзоиши таваҷҷуҳи Ҷумҳурии Корея ба Осиёи Марказӣ ҳамчун шарики мустақили минтақавӣ шаҳодат медиҳад. Барои кишварҳои минтақа бошад, Сеул пеш аз ҳама манбаи муҳими технология, сармоягузорӣ ва таҷрибаи рушди саноатӣ ва инноватсионӣ ба ҳисоб меравад.

Интизор меравад, ки дар ҷараёни ҳамоиш самтҳои мушаххаси рушди ҳамкории минбаъда баррасӣ шуда, заминаи институтсионалии робитаҳои кишварҳои Осиёи Марказӣ ва Ҷумҳурии Корея боз ҳам таҳким ёбад.

АКС: Хадамоти матбуоти Президенти Ҷумҳурии Тоҷикистон