Душанбе, 07 август, – АИ «Корвон Иттилоот». Роҳи оҳани Беларус дуюмин поезди боркаши мустақимро дар доираи лоиҳаи байналмилалии «Корвони славянӣ» ба роҳ монд, ки барои интиқоли маҳсулот ба Тоҷикистон, Қирғизистон ва Ӯзбекистон пешбинӣ шудааст. Қатора 3 август аз истгоҳи Орша-Шарқӣ ҳаракат карда, тавассути қаламрави Беларус, Русия, Қазоқистон ва Ӯзбекистон ба кишварҳои таъинот мерасад.
Вазни умумии бор аз 4 ҳазор тонна зиёд буда, маҳсулоти саноати коркарди чӯб ва саноати хӯроквории Беларусро дар бар мегирад, ки дорои арзиши баланди иловагӣ мебошанд ва барои бозорҳои Осиёи Марказӣ пешбинӣ шудаанд.
Бартарии асосии ин хадамоти нави логистикӣ истифодаи низоми ҳаракати мустақими қатора мебошад. Дар тамоми масир поезд бидуни ҷудо ё аз нав шакл додани таркиб дар истгоҳҳои мобайнӣ ҳаракат мекунад, ки муҳлати меъёрии интиқоли борро қариб ду баробар коҳиш дода, самаранокии ҳамлу нақли байналмилалиро баланд мебардорад.
Лоиҳа аллакай натиҷаҳои мусбат нишон медиҳад. Поезди аввалини «Корвони славянӣ», ки 30 июл бо 3,8 ҳазор тонна бор (51 вагон) ҳаракат карда буд, масофаи 3822 километр-ро тай намуда, 5 август ба истгоҳи Чукурсойи шаҳри Тошканд бомуваффақият расид.
Ташкилкунандагони лоиҳа ният доранд, ки чунин интиқолҳоро ба низоми доимӣ табдил диҳанд. Дар оянда фиристодани поездҳо моҳе ду маротиба ба нақша гирифта шуда, инчунин ҳамлу нақли контейнерӣ ҷорӣ мегардад, ки ба соҳибкорони хурду миёна имконият медиҳад аз 20 тонна сар карда, молҳои худро ба бозорҳои хориҷӣ интиқол диҳанд.
Қисми муҳими рушди долони нақлиётӣ таъсиси маркази муосири логистикии интермодалӣ дар шаҳри Орша мебошад, ки то охири соли 2026 ба истифода дода мешавад. Марказ ба хизматрасонии ҷараёни бор миёни Беларус ва кишварҳои Осиёи Марказиву Ҷанубӣ бо истифода аз тарифҳои имтиёзнок ва технологияҳои муосири логистикӣ машғул хоҳад шуд.
Рушди лоиҳаи «Корвони славянӣ» тамоюли ташаккули долонҳои нави устувори нақлиётиву логистикиро миёни кишварҳои АвруОсиё инъикос мекунад. Барои Тоҷикистон ин маънои кӯтоҳ гардидани муҳлати воридоти мол, боло рафтани эътимоднокии занҷираҳои таъминот ва коҳиш ёфтани хароҷоти нақлиётиро барои соҳибкорон дорад.
Дар шароити афзоиши гардиши мол миёни кишварҳои Осиёи Марказӣ ва Беларус чунин масирҳои мустақими роҳи оҳан рақобатпазирии ҳамлу нақли роҳи оҳанро тақвият дода, интиқоли масолеҳи сохтмонӣ, маҳсулоти саноати коркарди чӯб, маводи ғизоӣ ва дигар маҳсулоти саноатиро суръат мебахшанд.
Дар дурнамои миёнамуҳлат интиқолҳои мунтазам, рушди ҳамлу нақли контейнерӣ ва ташкили марказҳои логистикии интермодалӣ метавонанд ба яке аз омилҳои муҳими густариши ҳамкориҳои тиҷоратию иқтисодии Тоҷикистон бо кишварҳои фазои АвруОсиё ва ҳамгироии бештари ҷумҳурӣ ба долонҳои байналмилалии нақлиётӣ табдил ёбанд.
АКС: хадамоти матбуоти Роҳи оҳани Беларус