Душанбе, 02 май, – АИ «Корвон Иттилоот». 29 апрел дар Кафедрали муқаддаси Николаии шаҳри Душанбе маросими литургияи илоҳӣ бо иштироки митрополити Тошканд ва Ӯзбекистон Викентий, сардори ҳавзаи митрополии Осиёи Марказӣ, ва митрополити Душанбе ва Тоҷикистон Феодосий дар ҳамнамоии рӯҳониёни епархия баргузор гардид.

Пас аз анҷоми маросими ибодат дар ҳаёти епархияи Душанбе рӯйдоди муҳими дигар — қудсиятбахшии Хонаи меҳрубонӣ — баргузор шуд. Амалӣ шудани ин тарҳи иҷтимоӣ ба туфайли дастгирии президенти Ассотсиатсияи байналмилалии бокс (IBA) Умар Кремлёв ва Бунёди хайриявии «Русский Крест» имконпазир гардид.

Дар маросими тантанавӣ митрополит Викентий, митрополит Феодосий, Сафири Фавқулода ва Мухтори Федератсияи Русия дар Ҷумҳурии Тоҷикистон С. В. Григорьев, кормандони сафорат ва президенти бунёди «Русский Крест» Е. О. Благов иштирок карданд.

Пас аз анҷоми маросими қудсиятбахшӣ митрополит Викентий ба хайрхоҳон барои саҳми арзанда дар рушди хидмати иҷтимоии епархияи Душанбе изҳори сипос намуд. Ба суханони миннатдорӣ митрополит Феодосий низ ҳамроҳ шуд. Сафири Русия С. В. Григорьев бошад, аҳамияти чунин ташаббусҳоро таъкид карда, ба фаъолияти хайриявии епархия дастгирии худро изҳор дошт.

Акс: Муаллифи мундариҷаи рақамӣ Григорий Мухин