Душанбе, 18 июл, – АИ «Корвон Иттилоот». Тоҷикистон дар арсаи байналмилалӣ марҳилаи нави татбиқи сиёсати рушди устувори иқтисодиро оғоз намуда, афзалиятҳои асосии рушди кишварро то соли 2030 ба ҷомеаи ҷаҳонӣ пешниҳод кард.

Дар ҷаласаи сатҳи баланди Шӯрои иқтисодӣ ва иҷтимоии Созмони Милали Муттаҳид (ЭКОСОС) таҳти унвони «Роҳ ба сӯи соли 2030», ки дар шаҳри Ню-Йорк баргузор гардид, Вазири рушди иқтисод ва савдои Ҷумҳурии Тоҷикистон Абдураҳмон Абдураҳмонзода самтҳои асосии Барномаи миёнамуҳлати рушди Ҷумҳурии Тоҷикистон барои солҳои 2026–2030-ро муаррифӣ намуд.

Барномаи мазкур марҳилаи сеюм ва ниҳоии татбиқи Стратегияи миллии рушди Ҷумҳурии Тоҷикистон то соли 2030 ба шумор рафта, ба ташаккули иқтисодиёти рақобатпазир, устувор ва ба содирот нигаронидашуда равона гардидааст.

Зимни суханронӣ вазир афзалиятҳои калидии рушди кишварро барои солҳои наздик муайян намуда, таъкид кард, ки такягоҳи асосии рушди иқтисоди миллӣ саноатикунонии босуръат, рушди фарогир, рақамикунонии иқтисодиёт, рушди иқтисоди «сабз» ва сармоягузорӣ ба рушди сармояи инсонӣ хоҳанд буд.

Абдураҳмон Абдураҳмонзода инчунин таваҷҷуҳи ҷомеаи байналмилалиро ба мушкилоти кишварҳои кӯҳистонӣ ва давлатҳои рӯ ба рушде, ки ба баҳр баромад надоранд, ҷалб намуда, изҳор дошт, ки Саммити СММ оид ба Ҳадафҳои рушди устувор дар соли 2027 бояд ба марҳилаи нави сафарбарсозии захираҳои молиявӣ ва густариши дастрасӣ ба технологияҳои муосир барои чунин кишварҳо табдил ёбад.

Ба гуфтаи ӯ, дастрасии одилона ба сармоягузорӣ, технологияҳои нав, навовариҳо ва маблағгузории иқлимӣ барои татбиқи ҳадафҳои рушди устувор аҳамияти калидӣ дорад ва бояд яке аз самтҳои муҳими ҳамкориҳои байналмилалӣ гардад.

Ба арзёбии таҳлилгарон, иштироки Тоҷикистон дар чорабинии сатҳи баланди ЭКОСОС оғози марҳилаи нави дипломатияи иқтисодӣ мебошад, ки ҳадафи он ҷалби сармоягузориҳои хориҷӣ барои татбиқи Барномаи миёнамуҳлати рушди солҳои 2026–2030 мебошад. Марҳилаҳои қаблии Стратегияи миллии рушд ба таҳкими нишондиҳандаҳои макроиқтисодӣ мусоидат карданд, аммо амалисозии сиёсати саноатикунонии босуръат ва навсозии иқтисоди миллӣ захираҳои бузурги молиявиро талаб мекунад.

Коршиносон бар он назаранд, ки Тоҷикистон имрӯз аз мақоми кишвари кӯҳистонӣ ва бе баромад ба баҳр ҳамчун омили муҳими ташаккули рӯзномаи байналмилалӣ самаранок истифода мебарад. Дар шароити тағйирёбии иқлим ва афзоиши таваҷҷуҳи ҷомеаи ҷаҳонӣ ба масъалаҳои рушди устувор, Душанбе масъалаи таъмини дастрасии баробар ба сармоягузорӣ ва технологияҳоро ба яке аз меҳварҳои асосии муколамаи байналмилалӣ табдил додааст.

Ба гуфтаи таҳлилгарон, даъвати Вазири рушди иқтисод ва савдо барои пайвастани Саммити соли 2027 бо механизмҳои воқеии маблағгузорӣ нишон медиҳад, ки Тоҷикистон ба ҷуз аз изҳороти сиёсӣ, татбиқи амалии ӯҳдадориҳои байналмилалиро интизор аст. Пеш аз ҳама сухан дар бораи ҷалби сармоя барои рушди иқтисоди «сабз», татбиқи лоиҳаҳои бузурги энергетикӣ, аз ҷумла идомаи сохтмони Неругоҳи барқи обии «Роғун», навсозии иқтидорҳои саноатӣ ва рушди инфрасохтори рақамӣ меравад, ки барои таъмини рушди фарогир ва рақобатпазирии иқтисоди миллӣ аҳамияти стратегӣ доранд.

АКС: Вазорати рушди иқтисод ва савдои Ҷумҳурии Тоҷикистон