Душанбе, 26 сентябр, – АИ «Корвон Иттилоот». Дар шаҳри Душанбе ҷаласаи Кумитаи доимии Ассамблеяи парламентии Осиё (АПО) оид ба масъалаҳои иҷтимоӣ ва фарҳангӣ ба кор оғоз намуд. Чорабинӣ ҳайатҳои парламентии беш аз 20 давлати аъзои Ассамблеяро барои баррасии масъалаҳои муҳими ҳамкории иҷтимоӣ, фарҳангӣ ва гуманитарӣ дар минтақа гирди ҳам овард.

Дар кори ҷаласа роҳбарону ҳайатҳои баландпояи парламентии Амороти Муттаҳидаи Араб, Подшоҳии Арабистони Саудӣ, Шоҳигарии Бутан, Шоҳигарии Баҳрайн, Шоҳигарии Камбоҷа, Қатар, Бангладеш, Индонезия, Кипр, Покистон, Туркия, Салтанати Умон, Чин, Қазоқистон, Озарбойҷон, Узбекистон ва Русия, инчунин Дабири кулли АПО ва котиботи Ассамблея иштирок доранд.

Ҷумҳурии Тоҷикистон дар солҳои 2026–2027 раёсати Кумитаи доимии АПО оид ба масъалаҳои иҷтимоӣ ва фарҳангиро ба уҳда дорад ва баргузории ҷаласаи муҳташам дар Душанбе аз рӯйдодҳои марказии ин давраи раёсат ба шумор меравад.

Ин мақом барои Тоҷикистон имконияти беназир фароҳам меорад, ки фаъолияти кумитаро дар сатҳи баланд ҳамоҳанг созад, ҳамкории байни парламентҳои давлатҳои аъзоро таҳким бахшад ва пешбурди масъалаҳои иҷтимоӣ ва фарҳангии дорои аҳамияти минтақавиро тақвият диҳад.

Иштироки фаъоли Маҷлиси намояндагони Маҷлиси Олии Ҷумҳурии Тоҷикистон дар фаъолияти Ассамблея ба тавсеаи ҳамкории кишварҳои Осиё дар самтҳои гуманитарӣ ва таҳкими муколамаи байнипарламентӣ равона шудааст.

Ассамблеяи парламентии Осиё яке аз ниҳодҳои калидии ҳамкории байнипарламентии қитъа буда, масъалаҳои сиёсӣ, иқтисодӣ, иҷтимоӣ ва фарҳангиро фаро мегирад. Кумитаи доимӣ оид ба масъалаҳои иҷтимоӣ ва фарҳангӣ масъалаҳои ҳифзи мероси фарҳангӣ ва рушди инсонӣ, тандурустӣ ва иштироки занон дар фаъолияти парламентӣ, ҳуқуқу манфиатҳои кӯдакону ҷавонон ва муколамаи байнидинӣ, рушди сайёҳӣ ва густариши ҳамкории қонунгузориро мавриди баррасӣ қарор медиҳад.

Рамзӣ аст, ки баргузории ин ҷаласа ба соли 2026 рост омад, ки дар он Душанбе Пойтахти фарҳангии Осиё эълон шудааст. Ин мақом нақши Душанберо ҳамчун майдони муҳими муколамаи байнипарламентӣ ва фарҳангӣ дар минтақа боз ҳам таҳким мебахшад.

Баргузории ҷаласаи Кумитаи доимии АПО дар Душанбе нуфузи афзояндаи Тоҷикистонро дар пешбурди рӯзномаи гуманитарӣ ва таҳкими ҳамдигарфаҳмӣ миёни кишварҳои Осиё тасдиқ менамояд.

Акс: Хадамоти матбуоти Маҷлиси намояндагони Маҷлиси Олии Ҷумҳурии Тоҷикистон