Душанбе, 22 сентябр, – АИ «Корвон Иттилоот». Варзишгарони Тоҷикистон дар Ҷоми ҷаҳони самбо, ки рӯзҳои 19–20 сентябр дар Қасри теннис ва маҷмааи варзиши обии шаҳри Душанбе баргузор гардид, 8 медал — 2 тилло, 2 нуқра ва 4 биринҷӣ — ба даст оварданд.

Дар рӯзи охири мусобиқа Рамазон Ҷумаев дар вазни то 88 килограмм дар риштаи самбои варзишӣ медали тилло ба даст оварда, мақоми аввалро ишғол намуд.

Се варзишгари дигари тоҷик — Баҳромҷон Имомзода дар вазни то 98 килограмм, Беҳрӯз Ҳалимов дар вазни то 71 килограмм ва Сиёвуш Солиҳов дар вазни то 58 килограмм — дар риштаи самбои варзишӣ соҳиби медалҳои биринҷӣ гардида, ҷойи сеюмро гирифтанд.

Дар рӯзи аввали мусобиқа дар риштаи самбои размӣ Анӯшервон Назарзода дар вазни то 58 килограмм медали тилло ба даст овард. Комроншоҳ Устопириён дар вазни то 98 килограмм бошад, бо медали биринҷӣ ба мақоми сеюм баромад.

Ҳамчунин варзишгарони Тоҷикистон дар самбои нобиноён ба натиҷаҳои медалӣ ноил шуданд. Шоҳрух Назаров дар вазни то 79 килограмм ва Раҷаб Ҳусейнов дар вазни то 98 килограмм медалҳои биринҷӣ ба даст оварданд.

Тибқи иттилои телевизиони «Варзиш», дар Ҷоми ҷаҳони самбо 250 варзишгар аз 16 кишвар иштирок карданд. Мусобиқа дар се ришта — самбои варзишӣ, самбои размӣ ва самбои нобиноён — баргузор гардид.

Барои Тоҷикистон мусобиқаи имсола дар Душанбе яке аз чорабиниҳои муҳими байналмилалии самбо ба ҳисоб меравад. Соли гузашта низ пойтахти кишвар мизбони Ҷоми ҷаҳони самбо буд ва варзишгарони тоҷик дар он 9 медал — 2 тилло, 3 нуқра ва 4 биринҷӣ — ба даст оварданд.

ФОТО: ТВ «Варзиш»