Душанбе, 25 июл, – АИ «Корвон Иттилоот». Дар маркази маъмурии Вилояти Мухтори Кӯҳистони Бадахшон — шаҳри Хоруғ 24 июл Форуми байналмилалии сармоягузории «PamirInvest-2026» баргузор гардид. Чорабинӣ бо ташаббуси Мақомоти иҷроияи ҳокимияти давлатии Вилояти Мухтори Кӯҳистони Бадахшон, Кумитаи давлатии сармоягузорӣ ва идораи амволи давлатии Ҷумҳурии Тоҷикистон ва Ассотсиатсияи соҳибкорони Бадахшон ташкил карда шуд.

Тибқи анъана, форум намояндагони корпуси дипломатии муқими Тоҷикистон, соҳибкорону сармоягузорони ватаниву хориҷӣ ва шарикони рушдро гирди ҳам овард. Ҳадафи асосии чорабинӣ ҷалби сармояҳои дохиливу хориҷӣ, муаррифии лоиҳаҳои дурнамои иқтисодӣ ва таҳкими ҳамкории бахши давлатӣ ва хусусӣ мебошад.

Раиси Вилояти Мухтори Кӯҳистони Бадахшон Шарифхон Сафарзода ва ҳайати ҳамроҳонашро дар назди бинои мақомоти иҷроияи ҳокимияти давлатии шаҳри Хоруғ намояндагони аҳли фарҳангу ҳунари вилоят бо самимият истиқбол гирифтанд.

Пеш аз оғози қисми расмии форум роҳбарияти вилоят ва меҳмонон аз намоишгоҳи маҳсулоти саноатӣ ва ҳунарҳои мардумӣ дидан намуда, бо фаъолияти корхонаҳои истеҳсолӣ, маҳсули ҳунармандон ва мероси ғании фарҳангии Бадахшон шинос шуданд. Меҳмонон ба сатҳи ташкил ва гуногунрангии намоишгоҳ баҳои баланд доданд.

Раиси вилоят зимни ифтитоҳи қисми расмии форум ба ҳамаи иштирокдорон барои таваҷҷуҳ ба рушди минтақа изҳори сипос намуда, таъкид кард, ки баргузории «PamirInvest» ба яке аз абзорҳои муҳими татбиқи сиёсати давлатии сармоягузорӣ табдил ёфтааст.

Ба гуфтаи ӯ, бо шарофати сиёсати созандаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва дастгирии пайвастаи Ҳукумати мамлакат, форум ҳамасола ба рушди устувори иҷтимоиву иқтисодии вилоят мусоидат мекунад.

Зикр гардид, ки форуми имсола дар арафаи омодагии Ҷумҳурии Тоҷикистон ба таҷлили 35-солагии Истиқлоли давлатии Ҷумҳурии Тоҷикистон баргузор мешавад.

Таваҷҷуҳи махсус ба натиҷаҳои татбиқи солҳои 2022–2026 ҳамчун Солҳои рушди саноат зоҳир гардид. Дар панҷ соли охир дар шаҳру ноҳияҳои вилоят 174 корхонаи саноатӣ бунёд гардида, сохтмони боз 30 корхонаи дигар идома дорад.

Дар баробари ин, дар соҳаҳои нақлиёт, кишоварзӣ, сайёҳӣ ва энергетика низ корҳои назаррас анҷом дода шудаанд. Имсол ба анҷом расидани сохтмони қитъаи роҳи байналмилалии Душанбе — Хоруғ — Кулма аз маркази ноҳияи Дарвоз то даромадгоҳи ноҳияи Рӯшон дар назар буда, баъдан марҳилаи навбатии навсозии ин шоҳроҳ оғоз мегардад.

Бо мавриди истифода қарор гирифтани Неругоҳи барқи обии «Себзор» дар ноҳияи Роштқалъа ва бунёди як қатор неругоҳҳои офтобӣ дар ноҳияи Мурғоб иқтидори энергетикии вилоят ба таври назаррас тақвият ёфт. Ҳамзамон, корҳои таҳияи асосноккунии техникӣ-иқтисодии лоиҳаҳои нави энергетикӣ, аз ҷумла НБО «Санобод» дар ноҳияи Рӯшон идома доранд.

Дар ҷараёни форум таъкид гардид, ки натиҷаҳои форумҳои солҳои гузашта ва ҳамкориҳои муваффақ бо шарикони байналмилалӣ нишон медиҳанд, ки дар заминаи эътимоди мутақобила метавон лоиҳаҳои бузурги дорои аҳамияти стратегиро амалӣ намуд.

Пас аз суханронии раиси вилоят ба иштирокдорон навори муаррифавӣ оид ба иқтидорҳои иқтисодӣ ва сармоягузории ВМКБ намоиш дода шуд. Сипас намояндагони сохторҳои давлатӣ, доираҳои соҳибкорӣ ва ташкилотҳои байналмилалӣ имкониятҳои ҳамкориро муаррифӣ намуда, омодагии худро барои густариши сармоягузорӣ ба иқтисодиёти минтақа изҳор карданд.

Дар натиҷаи Форуми байналмилалии сармоягузории «PamirInvest-2026» дар маҷмӯъ 57 тафоҳумнома ва созишнома ба маблағи умумии зиёда аз 6 миллиарду 580 миллион сомонӣ ба имзо расид.

Форуми «PamirInvest-2026» бори дигар мавқеи Вилояти Мухтори Кӯҳистони Бадахшонро ҳамчун яке аз минтақаҳои дорои дурнамои баланди сармоягузорӣ дар Ҷумҳурии Тоҷикистон тасдиқ намуд.

Ҳаҷми назарраси созишномаҳои баимзорасида аз таваҷҷуҳи рӯзафзуни сармоягузорон ба лоиҳаҳои гидроэнергетика, саноат, инфрасохтори нақлиётӣ ва сайёҳӣ шаҳодат медиҳад. Рушди пайгиронаи иқтидори истеҳсолӣ, навсозии шабакаҳои нақлиётӣ ва татбиқи лоиҳаҳои энергетикӣ барои рушди дарозмуддати иқтисодии ВМКБ ва таҳкими мавқеи он дар харитаи сармоягузории Осиёи Марказӣ заминаи устувор фароҳам меорад.

АКС: Мақомоти иҷроияи ҳокимияти давлатии Вилояти Мухтори Кӯҳистони Бадахшон