Душанбе, 24 август, – АИ «Корвон Иттилоот». Дар боғи тобистонаи «Алмосӣ»-и шаҳри Ҳисор 22 августи ифтитоҳи расмии Шӯрои ҳамоҳангсозии рақамӣ дар соҳаи алоқа баргузор гардид.

Чорабинӣ оғози механизми амалии татбиқи Стратегияи рушди соҳаи алоқаи Ҷумҳурии Тоҷикистон барои давраи то соли 2040-ро нишон дод ва қадами муҳим дар таъмини институтсионалии табдилдиҳии рақамии кишвар гардид.

Раисони ҳамроҳи форуми баланд Муовини якуми Сарвазири Ҷумҳурии Тоҷикистон, муовини раиси Шӯрои рушди иқтисодиёти рақамӣ назди Президенти ҶТ Холиқзода Ҳоким ва сардори Хадамоти алоқа назди Ҳукумати ҶТ, раиси Шӯрои ҳамоҳангсозии рақамии таъсисёфта Исфандиёри Саъдулло буданд.

Дар кори маҷлис Ҳамоҳангсози доимии СММ дар Тоҷикистон, роҳбарони намояндагиҳои Бонки Осиёии Рушд, Гурӯҳи Бонки Ҷаҳонӣ, Бонки Аврупоии Бозсозӣ ва Рушд, намояндагони корпуси дипломатӣ ва идораҳои профилии кишвар иштирок карданд.

Иштирокчиён Эъломияи Шӯроро расман имзо карда, ӯҳдадориҳоро оид ба ҳамкории байниидоравӣ ва байналмилалӣ мустаҳкам намуданд ва санаву рӯзномаи ҷаласаи аввали кории онро мувофиқа карданд. Ба шарикон ва аъзои шӯро раис, роҳбарон ва раисони ҳамроҳи гурӯҳҳои корӣ, инчунин котиботи мақом муаррифӣ гардиданд.

Ба ифтихори 35-солагии Истиқлоли давлатии Ҷумҳурии Тоҷикистон маркаи ёдгории почта ба муомилот бароварда шуд. Раисони ҳамроҳ ва меҳмонони фахрӣ мӯҳри махсуси рӯзи аввалро гузоштанд.

Аз нуқтаи назари таҳлилӣ таъсиси Шӯрои ҳамоҳангсозии рақамӣ платформаи институтсионалиро барои муттаҳид кардани кӯшишҳои давлат, муассисаҳои молиявии байналмилалӣ ва бахши IT эҷод мекунад.

 Ин имкон медиҳад, ки модернизатсияи инфрасохтори телекоммуникатсионӣ, ҷорӣ намудани технологияҳои 5G ва васеъ кардани дастрасӣ ба интернети баландсуръат дар тамоми Тоҷикистон дар доираи ҳадафҳои табдилдиҳии рақамии кишвар то соли 2040 суръат бахшида шавад. Ташаккули чунин мақом равиши системавиро ба рақамикунонӣ ҳамчун яке аз афзалиятҳои рушди дарозмуддат инъикос мекунад.

Акс: Хадамоти алоқа назди Ҳукумати Ҷумҳурии Тоҷикистон