Душанбе, 27 октябр, – АИ «Корвон Иттилоот». Дар Тоҷикистон Рӯзи ҷаҳонии озуқаворӣ таҳти унвони «Навоварии имрӯз — таъмини ғизо» таҷлил гардид.

Чорабинӣ бо ташаббуси Барномаи озуқавории ҷаҳонии Созмони Милали Муттаҳид (БОҶ), Созмони озуқаворӣ ва кишоварзии СММ (ФАО) ва Пажуҳишгоҳи ғизои соҳавӣ (SIFI) баргузор шуда, намояндагони мақомоти давлатӣ, созмонҳои рушд, деҳқонон, соҳибкорон ва ҷомеаи шаҳрвандиро ба ҳам овард.

Иштирокчиён нақши навоварӣ дар рушди низомҳои озуқаворӣ, аҳамияти ғизои солим ва серғизо, инчунин роҳҳои таъмини амнияти озуқавории устуворро баррасӣ карданд. Диққати асосӣ ба зарурати фароҳам овардани шароит барои дастрасии ҳама ба ғизои босифат ва солим, инчунин бунёди ояндаи солимтар равона гардид.

Дар ҷараёни чорабинӣ аҳамияти ҳамкории мақомоти давлатӣ, созмонҳои байналмилалӣ, бахши хусусӣ, деҳқонон ва ҷомеаи шаҳрвандӣ дар дигаргунсозии низомҳои озуқаворӣ таъкид шуд. Иштирокчиён зарурати дастгирии воситаҳои зиндагии устувор ва ҷорӣ намудани роҳҳои навоваронаро барои беҳтар кардани дастрасии аҳолӣ ба ғизои серғизо муҳим арзёбӣ карданд.

Ташкилкунандагон таъкид намуданд, ки ҳамкории муштарак метавонад ба пешбурди тағйироти воқеӣ, таҳкими ҷомеаҳо ва фароҳам овардани имкониятҳои баробар барои дастрасӣ ба ғизои солим мусоидат кунад, то ки ҳеҷ кас аз ин раванд дар канор намонад.

Акс: Созмони озуқаворӣ ва кишоварзии СММ (ФАО)