Душанбе, 4 ноябр, – АИ «Корвон Иттилоот». Дар Муассисаи «Хонаи рус» дар Душанбе барои мутахассисони соҳаи тандурустии Ҷумҳурии Тоҷикистон курсҳои такмили ихтисос баргузор шуданд. Барномаи омӯзишӣ ба усулҳои муосири ошкорсозӣ, пешгирӣ ва назорати эпидемиологии бемориҳои сироятии махсусан хатарнок бахшида шуда буд.

Омӯзиш таҳти роҳбарии Хадамоти федералии назорат дар соҳаи ҳифзи ҳуқуқи истеъмолкунандагон ва некӯаҳволии инсон (Роспотребнадзор) бо иштироки се муассисаи илмӣ-таҳқиқотии Русия — Донишкадаҳои зидди вабои Ставропол ва Ростови лаби Дон, инчунин Донишкадаи зидди вабои Русия «Микроб» баргузор гардид.

Барномаи курсҳо усулҳои муосири эпидемиология, ташхиси лабораторӣ ва пешгирии бемориҳои вабо, брутселлёз, сӯхтанӣ ва табларзаи геморрагии Қриму Конгоро фаро гирифт. Иштирокчиён бо равишҳои касбии ташхиси бемориҳои сироятӣ ва ташкили назорати эпидемиологӣ шинос шуданд.

Дар курсҳо намояндагони муассисаҳои соҳавии Вазорати тандурустӣ ва ҳифзи иҷтимоии аҳолии Тоҷикистон иштирок карданд. Аз ҷумла, директори Маркази ҷумҳуриявии мубориза бар зидди бемориҳои карантинӣ Замир Гулмаҳмадзода низ дар ин чорабинӣ ҳузур дошт.

Чунин барномаҳои омӯзишӣ барои тақвияти иқтидори миллӣ дар самти таъмини амнияти санитарию эпидемиологӣ аҳаммияти амалӣ доранд. Ошкорсозии саривақтии бемориҳо, ташхиси босифати лабораторӣ ва андешидани чораҳои ҳамоҳангшудаи пешгирикунанда омодагии хадамоти соҳавиро барои пешгирӣ ва маҳдуд кардани паҳншавии хатарҳои эҳтимолии эпидемиологӣ баланд мебардоранд.

Курсҳои мазкур ҳамзамон барои табодули таҷрибаи касбӣ миёни мутахассисони Русия ва Тоҷикистон ва густариши ҳамкории дуҷониба дар соҳаи тандурустӣ замина фароҳам оварданд.

Акс: Хонаи русӣ дар Душанбе