Душанбе, 24 август, – АИ «Корвон Иттилоот». Дар Тоҷикистон натиҷаҳои барномаи таҷрибаомӯзии Internship Gateway ҷамъбаст гардид, ки ба пешниҳоди таҷрибаи аввалини амалии корӣ, рушди малакаҳои калидии ғайрикасбӣ ва мусоидат ба шуғл барои ҷавонон равона шудааст.

Лоиҳа, ки аз ҷониби БР СММ ҳамроҳ бо Вазорати саноат ва технологияҳои нави ҶТ ва TechnoHub бо дастгирии молиявии Ҳукумати Федератсияи Россия амалӣ гардид, самаранокии баланд нишон дод: беш аз нисфи иштирокчиён аллакай ба ҳайати ширкатҳои пешрафтаи ватанӣ қабул шудаанд.

Дар барнома 393 нафар аз тамоми минтақаҳои Тоҷикистон — 220 духтарон ва 173 ҷавонон, аз ҷумла шахсони дорои маъюбият — иштирок карданд. 225 иштирокчӣ дар ширкатҳои шарик ҷойи кори доимӣ гирифтанд, ки беш аз 57 фоизи шумораи умумии таҷрибаомӯзонро ташкил медиҳад.

Дар доираи Рӯзи намоиши ниҳоӣ мутахассисони ҷавон дастовардҳо ва ҳикояҳои муваффақияти худро пешниҳод карданд. Таҷрибаомӯзӣ ба онҳо имкон дод, ки салоҳиятҳои касбиро дар ҷойҳои воқеии корӣ аз худ кунанд, инчунин малакаҳои худпешниҳодкунӣ, тафаккури танқидӣ ва сохтани траекторияи дарозмуддати касбиро ташаккул диҳанд.

Диққати махсус дар лоиҳа ба принсипҳои фарогирӣ ва дастрасии баробар дода шудааст. Таъмини имкониятҳои баробар барои духтарон ва ҷавонон аз минтақаҳои дурдаст ба ҳаракатпазирии иҷтимоӣ ва таҳкими иқтидори иқтисодии ҷумҳурӣ мусоидат мекунад.

Ташаббус дар доираи лоиҳаи ҳамаҷонибаи БР СММ «Васеъ кардани имкониятҳои ҷавонон тавассути рушди малакаҳо ва пешбурди инноватсияҳо дар Тоҷикистон» амалӣ гардидааст. Синергияи бахши давлатӣ, платформаи инноватсионии TechnoHub ва дастгирии байналмилалӣ «пули» самаранокро байни системаи таълим ва бозори воқеии меҳнати Тоҷикистон эҷод кард.

Аз нуқтаи назари таҳлилӣ дар шароите, ки ҷумҳурӣ курси индустриализатсияи суръатнок ва рақамикунониро амалӣ мекунад, эҷоди ҷойҳои кории сифатноки маҳаллӣ барои ҷавонон афзалияти стратегӣ мебошад.

Чунин барномаҳо ба коҳиш додани муҳоҷирати меҳнатӣ, рушди сармояи инсонӣ ва ташаккули захираи кадрӣ барои саноат ва бахши IT-и ватанӣ мусоидат мекунанд. Натиҷаҳои муваффақи Internship Gateway самаранокии шарикии давлат, созмонҳои байналмилалӣ ва бахши хусусиро дар ҳалли масъалаҳои шуғли насли ҷавон тасдиқ мекунанд.

Акс: БР СММ дар Тоҷикистон / Вазорати саноат ва технологияҳои нави ҶТ