Душанбе, 04 июн, – АИ «Корвон Иттилоот». Дар Кумитаи кор бо занон ва оилаи назди Ҳукумати Ҷумҳурии Тоҷикистон нахустин ҷаласаи Президиуми Шӯрои ҷамъиятии «Занони Тоҷикистон» баргузор гардид. Ҷаласа таҳти роҳбарии раиси Кумита Бунафша Файзиддинзода доир шуда, ба як марҳилаи муҳим дар фаъолияти навбатии ин минбари ҷамъиятӣ табдил ёфт, ки ҳадафи он муттаҳид сохтани иқтидори занони фаъоли кишвар мебошад.

Тавре дар ҷаласа таъкид гардид, Шӯро бо мақсади ҳамоҳанг сохтани талошҳои занони Тоҷикистон дар самти ободонӣ, созандагӣ, ҳифзи манфиатҳои миллӣ, таҳкими сулҳу ваҳдат ва мусоидат ба рушди устувори кишвар таъсис дода шудааст. Ин сохтори машваратӣ бояд ба як майдони мубодилаи афкор ва таҷриба дар масъалаҳои густариши нақши занон дар татбиқи ҳадафҳои стратегии давлат табдил ёбад.

Дар меҳвари баррасии ҷаласа масъалаи баланд бардоштани маърифати сиёсӣ, ҳуқуқӣ ва фарҳангии занон, духтарон ва ҷавонон қарор дошт. Ҳамзамон тарбияи насли наврас дар рӯҳияи ватандӯстӣ, худшиносии миллӣ ва эҳтиром ба арзишҳои фарҳангии миллат аз ҷумлаи самтҳои афзалиятнок арзёбӣ гардид. Ба масъалаи пешгирии хурофотпарастӣ, таассуб, ифротгароӣ ва таъсири фарҳанги бегона низ таваҷҷуҳи махсус зоҳир карда шуд.

Дар қатори вазифаҳои Шӯро ҳамчунин дастгирии ташаббусҳои занон дар соҳаҳои маориф, илм, фарҳанг, соҳибкорӣ ва ҳунарҳои мардумӣ, инчунин таҳкими ҳамкории сохторҳои давлатӣ, ташкилотҳои ҷамъиятӣ ва ҷомеаи шаҳрвандӣ оид ба масъалаҳои занон ва оила қайд гардид.

Таъкид шуд, ки дар шароити ғамхории пайвастаи давлат Шӯрои ҷамъиятии «Занони Тоҷикистон» барои иштироки бештари занон дар амалисозии ҳадафҳо ва вазифаҳои миллӣ имкониятҳои иловагӣ фароҳам меорад. Аз 22 декабри соли 2025 ин сохтор тибқи Низомномаи тасдиқшуда ҳамчун мақоми машваратии ҷамъиятӣ фаъолият мекунад.

Ба ҳайати Президиум 24 нафар шомиланд, дар маҷмуъ бошад, 452 намояндаи вазорату идораҳо, ташкилоту муассисаҳо ва ҳамчунин намояндагони Вилояти Мухтори Кӯҳистони Бадахшон, вилоятҳо, шаҳру ноҳияҳои кишвар узви Шӯро интихоб шудаанд.

Дар ҷаласа таъкид гардид, ки маҳз занон ва модарон дар таҳкими арзишҳои оилавӣ, рушди ҷомеа, баланд бардоштани сифати хизматрасониҳои иҷтимоӣ ва тарбияи фарзандони донишманду ватандӯст нақши калидӣ доранд. Онҳо бо ташаккули муҳити ҳамдигарфаҳмӣ ва дастгирӣ дар оила ва ҷомеа ба таҳкими ваҳдат, дӯстӣ ва эҳтироми мутақобила мусоидат менамоянд.

Пас аз ҷаласа аъзои Президиум ва кормандони Кумита дар оромгоҳи Лучоб дар маросими гулгузорӣ ба хотири Нусратулло Махсум, Шириншоҳ Шоҳтемур ва Нисор Муҳаммад — чеҳраҳои барҷастаи давлатдории тоҷикон ва фарҳанги миллӣ — иштирок намуданд. Иштирокчиён хотираи ин фарзандони баруманди миллатро гиромӣ дошта, ба оромгоҳҳои онҳо гулчанбарҳо гузоштанд.

АКС: Кумитаи кор бо занон ва оилаи назди Ҳукумати Ҷумҳурии Тоҷикистон