Душанбе, 16 июн, – АИ «Корвон Иттилоот». Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо шахсоне, ки ба вазифаҳои роҳбарикунанда дар як қатор мақомоти марказии давлатӣ таъин гардиданд, мулоқот анҷом дод.

Тағйироти кадрӣ ҳайати роҳбарикунандаи Кумитаи давлатии сармоягузорӣ ва идораи амволи давлатӣ, Кумитаи андоз, Кумитаи хоҷагии манзилию коммуналӣ, Кумитаи ҳифзи муҳити зист, Хадамоти зиддиинҳисорӣ, Академияи миллии илмҳои Тоҷикистон, Донишкадаи кӯҳию металлургии Тоҷикистон, инчунин муассисаҳои илмӣ ва таълимии Донишгоҳи байналмилалии сайёҳӣ ва соҳибкории Тоҷикистонро фаро гирифт.

Ба вазифаҳои роҳбарикунанда кадрҳои ҷавон, соҳибтаҷриба ва дар фаъолияти худ санҷидашуда таъин шуданд. Аз ҷумла, муовини раиси Кумитаи давлатии сармоягузорӣ ва идораи амволи давлатӣ, сардори Хадамоти назорати давлатии истифодаи амволи давлатӣ, муовини якум ва муовинони раиси Кумитаи андоз, муовинони роҳбарони як қатор кумитаҳо ва идораҳо, ректори Донишкадаи кӯҳию металлургии Тоҷикистон, намояндаи Тоҷикистон дар Кумитаи иҷроияи Фонди байналмилалии наҷоти Арал, инчунин роҳбарони муассисаҳои илмӣ ва таълимӣ ба вазифаҳои нав таъин гардиданд.

Зимни суҳбат Сарвари давлат зарурати хизмати содиқона ба халқу давлат, такмили доимии дониш ва малакаҳои касбӣ, рушди қобилияти идоракунӣ, омӯзиши забони давлатӣ ва забонҳои хориҷӣ, инчунин тарбияи кадрҳои ҷавону ояндадорро таъкид намуд.

Таваҷҷуҳи махсус ба масъалаҳои суръат бахшидан ба раванди рақамикунонӣ, ҷорӣ намудани технологияҳои муосир ва истифодаи самараноку бехатари имкониятҳои зеҳни сунъӣ равона гардид. Ҳамчунин муҳимияти такмили ҳамкорӣ бо сармоягузорон ва соҳибкорон ҳамчун яке аз омилҳои муҳими рушди устувори иқтисодии кишвар таъкид шуд.

Ба роҳбарони муассисаҳои илмӣ ва таълимӣ низ ҷиҳати баланд бардоштани сифати таълиму тарбия, такмили фаъолияти илмӣ ва омода намудани мутахассисони ҷавобгӯ ба талаботи замони муосир супоришҳои мушаххас дода шуданд.

Коршиносон бар ин назаранд, ки таъйиноти навбатии кадрӣ сиёсати пайгиронаи давлатро дар самти таҷдиди ҳайати идоракунӣ, ҷорӣ намудани равишҳои инноватсионӣ дар идоракунии давлатӣ ва баланд бардоштани самаранокии фаъолияти мақомоти стратегӣ боз ҳам тақвият мебахшад.

Фото:  пресс-служба Президента  Республики Таджикистан