Душанбе, 11 сентябр, – АИ «Корвон Иттилоот».  Аз 14 то 15 октябри соли 2026 Душанбе ба майдони байналмилалии баррасии иқтидори сармоягузорӣ ва соҳибкории Тоҷикистон табдил хоҳад ёфт. Дар пойтахт Форуми байналмилалии «Тоҷикистон — ба пеш» баргузор мегардад, ки намояндагони сохторҳои давлатӣ, бахши хусусӣ, созмонҳои молиявии байналмилалӣ, доираҳои сармоягузорӣ ва ҷомеаи технологиро ба ҳам меорад.

Тавре Кумитаи давлатии сармоягузорӣ ва идораи амволи давлатии Ҷумҳурии Тоҷикистон хабар медиҳад, ҳадафи асосии форум муаррифии имкониятҳои нави сармоягузории кишвар ба шарикони байналмилалӣ, ҳавасмандгардонии татбиқи инноватсияҳо ва густариши механизмҳои ҳамкории давлат ва бахши хусусӣ мебошад.

Барномаи кории форум чанд самти калидиро дар бар мегирад, ки афзалиятҳои кунунии рушди иқтисоди муосирро инъикос менамоянд.

Яке аз майдонҳои марказии форум Форуми шарикии давлат ва бахши хусусӣ хоҳад буд. Иштирокдорони он механизмҳои амалии ҳамкории давлат ва бахши соҳибкориро ҳангоми татбиқи лоиҳаҳои инфрасохторӣ ва иҷтимоӣ баррасӣ хоҳанд кард.

Ба Форуми сармояи венчурӣ низ таваҷҷуҳи махсус дода мешавад. Ин майдон ба рушди соҳибкории технологӣ равона шуда, муаррифии стартапҳо, баррасии имкониятҳои ҷалби сармоя ба бахши технология ва масъалаҳои дастгирии ташаббусҳои нави соҳибкориро дар бар мегирад.

Ҷузъи байналмилалӣ ва коршиносии барномаро G10 Insight Forum 2026 тақвият медиҳад. Дар доираи он тамоюлҳои ҷаҳонии иқтисодӣ, бозорҳои байналмилалӣ ва равандҳои муосири рушди молиявӣ мавриди баррасӣ қарор мегиранд.

Қисми муҳими форумро ҳамчунин намоишгоҳи дастовардҳо ва лоиҳаҳои сармоягузорӣ ташкил хоҳад дод. Дар он маҳсулоти соҳибкории ватанӣ ва лоиҳаҳои дорои иқтидори сармоягузории Тоҷикистон муаррифӣ карда мешаванд.

Интизор меравад, ки дар кори форум намояндагони вазорату идораҳо, роҳбарони ширкатҳои хориҷӣ ва ватанӣ, ниҳодҳои молиявии байналмилалӣ, институтҳои рушд, коршиносон, фондҳои венчурӣ ва ҷомеаи стартапҳо иштирок намоянд.

Ташкилкунандагон ба фароҳам овардани шароит барои муколамаи мустақими B2B ва B2G таваҷҷуҳ зоҳир мекунанд, ки ба сармоягузорон ва намояндагони соҳибкорӣ имкон медиҳад бо сохторҳои давлатӣ ва шарикони эҳтимолӣ бевосита ҳамкорӣ намоянд.

Аз ҷумла, муаррифии лоиҳаҳои омодаи сармоягузорӣ ва намунаҳои мушаххаси тиҷоратӣ, табодули таҷрибаи байналмилалӣ, ҷустуҷӯи шаклҳои нави ҳамкорӣ ва омодасозии созишномаҳои шарикии дарозмуддат аз ҳадафҳои асосии форум ба шумор мераванд.

Баргузории форум дар Душанбе талошҳои Тоҷикистонро барои таҳкими ҷузъи сармоягузории сиёсати иқтисодӣ ва гузариш аз муаррифии иқтидори умумии кишвар ба пешбурди лоиҳаҳои мушаххас ва механизмҳои татбиқи онҳо инъикос менамояд.

Ҳамгироии ниҳодҳои давлатӣ, бахши хусусӣ, созмонҳои молиявӣ ва бахши технологӣ дар доираи як майдони ягона метавонад барои ташаккули робитаҳои нави тиҷоратӣ ва густариши ҳамкории байналмилалии сармоягузорӣ шароити мусоид фароҳам оварад.

Дар ин замина, форуми «Тоҷикистон — ба пеш» на танҳо ҳамчун майдони муаррифӣ, балки ҳамчун фазо барои музокирот, интихоби лоиҳаҳои ояндадор ва таҳияи қарорҳои амалӣ барои рушди минбаъдаи соҳибкорӣ, инноватсия ва фаъолияти сармоягузорӣ дар кишвар арзёбӣ мешавад.

АКС: АМИТ «ХОВАР»