Душанбе, 22 май, – АИ «Корвон Иттилоот». 20 май дар Сафорати Ҷумҳурии Мардумии Чин дар Душанбе нишасти матбуотии сафири Чин дар Тоҷикистон Го Чжицзюн баргузор гардид, ки ба натиҷаҳои сафари давлатии Президенти Тоҷикистон Эмомалӣ Раҳмон ба Чин бахшида шуда буд. Дар ин чорабинӣ иҷрокунандаи вазифаи муовини сардори Раёсати иттилоот ва матбуоти Вазорати корҳои хориҷии Тоҷикистон Саидҷон Шафизода ва намояндагони расонаҳои тоҷикӣ ва хориҷӣ иштирок карданд.
Ба гуфтаи дипломат, сафари Эмомалӣ Раҳмон, ки аз 11 то 14 май бо даъвати Раиси Ҷумҳурии Мардумии Чин Си Ҷинпин анҷом ёфт, марҳалаи муҳими таҳкими муносибатҳои Тоҷикистону Чин гардид. Дар меҳвари гуфтугӯҳо эътимоди сиёсӣ, ташаббуси «Як камарбанд — як роҳ», ҳамкории тиҷоративу иқтисодӣ, табодули башардӯстона, масъалаҳои амният ва ҳамоҳангӣ дар минбарҳои байналмилалӣ қарор доштанд.
Го Чжицзюн хотиррасон кард, ки дар пайи ин сафар 31 созишнома ва санади ҳамкорӣ ба имзо расид, аз ҷумла Шартнома оид ба ҳамсоягии абадӣ, дӯстӣ ва ҳамкорӣ ва Изҳороти муштарак оид ба амиқсозии шарикии ҳамаҷонибаи стратегӣ дар давраи нав. Ба гуфтаи ӯ, ин як марҳалаи таърихӣ дар муносибатҳои ду кишвар маҳсуб мешавад.
Сафир таъкид намуд, ки миёни Душанбе ва Пекин сатҳи баланди муколамаи сиёсӣ вуҷуд дорад. Роҳбарони ду давлат, ба гуфтаи ӯ, на танҳо робитаҳои корӣ, балки дӯстии амиқи шахсӣ доранд ва ҳадафи пешбурд ба сӯи бунёди ҷомеаи сарнавишти ягона имрӯз дақиқ муайян шудааст.
Бахши иқтисодӣ аз муҳимтарин мавзӯъҳо буд. Го Чжицзюн гуфт, ки ташаббуси чинии «Як камарбанд — як роҳ» имрӯз бо Стратегияи миллии рушди Тоҷикистон то соли 2030 фаъолона ҳамоҳанг карда мешавад. Дар натиҷа, ҳамкориҳо дар қариб ҳамаи самтҳо босуръат рушд доранд: ҳамкории тиҷоративу иқтисодӣ тақвият меёбад, ҳамкорӣ дар соҳаи технологияҳои баланд васеъ мешавад ва табодули башардӯстона мазмуни бештар касб мекунад.
Ба гуфтаи дипломати чинӣ, дар Пекин Форуми рақамии тиҷоратии Тоҷикистону Чин бо иштироки беш аз 120 ширкати технологии чинӣ ва 70 корхонаи тоҷик баргузор шуд. Дар байни иштироккунандагон ӯ ширкатҳои бузург, аз ҷумла TikTok, BYD ва Huawei-ро ном бурд. Дар натиҷаи мулоқотҳои соҳибкорӣ беш аз 50 санади ҳамкорӣ ба имзо расид. Интизор меравад, ки татбиқи тавофуқҳои ҳосилшуда метавонад ба иқтисоди Тоҷикистон тақрибан 8 миллиард доллар сармоягузорӣ ҷалб кунад.
Дар семоҳаи аввали соли ҷорӣ ҳаҷми савдои дуҷониба ба 790 миллион доллар расид, ки нисбат ба ҳамин давраи соли гузашта беш аз 50 фоиз зиёд аст. Ба гуфтаи сафир, Чин дар соли 2025 низ мавқеи худро ҳамчун бузургтарин шарики тиҷоратии Тоҷикистон ва манбаи асосии сармоягузории хориҷӣ нигоҳ дошт.
Дар посух ба суолҳои рӯзноманигорон дар бораи дурнамои корхонаҳои муштараки истеҳсолӣ, Го Чжицзюн дар бораи сафари Эмомалӣ Раҳмон ба Чунцин нақл кард. Ба гуфтаи ӯ, президент корхонаҳои бузург, аз ҷумла заводи SERES ва боғи саноатии Zongshen-ро боздид намуда, бо истеҳсоли мошинҳои барқӣ ва мотосиклҳо шинос шуд ва ҳатто AITO Wenjie M9-ро шахсан санҷид.
Мавзӯи башардӯстона низ дар меҳвари нишаст қарор дошт. Эмомалӣ Раҳмон ба Донишгоҳи Пекин ташриф овард, ки дар он ҷо ба ӯ унвони «Профессори фахрӣ» дода шуд. Президенти Тоҷикистон дар суханронии худ зарурати густариши ҳамкорӣ дар соҳаи маориф, илм ва омодасозии кадрҳоро таъкид кард. Ӯ ҳамчунин гуфт, ки ҳоло дар донишгоҳҳои Чин тақрибан 6000 донишҷӯи тоҷик таҳсил мекунанд ва изҳори омодагӣ намуд, ки дар Данғара Институти сеюми Конфутсий боз шавад.
Дар анҷоми нишасти матбуотӣ Го Чжицзюн изҳори итминон кард, ки тавофуқҳои ҳосилшуда ба ҳамкории Тоҷикистону Чин такони нав мебахшанд ва барои амалӣ шудани лоиҳаҳои муштарак дар бахшҳои гуногун имкониятҳои бештар фароҳам меоранд.
АКС: Хадамоти матбуоти Президенти Ҷумҳурии Тоҷикистон