Душанбе, 23 сентябр, – АИ «Корвон Иттилоот». Дар Консулгарии генералии Федератсияи Русия дар шаҳри Хуҷанд раванди овоздиҳӣ дар интихоботи вакилони Думаи давлатии Федератсияи Русия баргузор гардид.

Дар миёни шаҳрвандони Русия, ки ҳуқуқи конститутсионии худро дар қаламрави Тоҷикистон амалӣ карданд, иштирокчиёни лоиҳаи башардӯстонаи «Омӯзгори рус дар хориҷ аз кишвар», ки дар муассисаҳои таълимии вилояти Суғд фаъолият доранд, иштироки фаъол нишон доданд.

Омӯзгорони рус, ки дар мактабҳои минтақа дарс медиҳанд, ба таври дастаҷамъона ба участкаи интихоботии №8283, воқеъ дар бинои намояндагии дипломатӣ бо суроғаи шаҳри Хуҷанд, кӯчаи Сирдарё, 21 ҳозир шуданд.

Участкаи интихоботӣ фаъолияти худро тибқи ҷадвали муайяншуда — соати 08:00 бо вақти маҳаллӣ оғоз кард. Ташкилкунандагон барои изҳори озод ва шаффофи иродаи ҳамватаноне, ки дар шимоли Тоҷикистон иқомат ва ё муваққатан фаъолият доранд, тамоми шароити заруриро фароҳам оварданд. Овоздиҳӣ то соати 20:00 идома хоҳад кард.

Иштироки омӯзгорон дар ин рӯйдоди муҳими сиёсии кишвари худ на танҳо мавқеи фаъоли шаҳрвандии онҳоро ифода мекунад, балки аз масъулияти баланди онҳо дар назди ҷомеа низ шаҳодат медиҳад.

Лоиҳаи башардӯстонаи «Омӯзгори рус дар хориҷ аз кишвар» чанд сол боз дар Тоҷикистон бомуваффақият амалӣ шуда, ба таҳкими фазои ягонаи таълимӣ ва густариши забони русӣ дар минтақа мусоидат мекунад.

Омӯзгорон аз минтақаҳои гуногуни Русия дар мактабҳои Тоҷикистон фаъолият карда, таҷрибаи худро интиқол медиҳанд, стандартҳои муосири таълимиро ҷорӣ менамоянд ва робитаҳои анъанавии дӯстӣ ва ҳамдигарфаҳмии байни халқҳои ду кишварро таҳким мебахшанд.

Иштироки омӯзгорон дар овоздиҳӣ робитаи зичи ҳамватанонро бо Ватан, сарфи назар аз иҷрои рисолати муҳими маърифатӣ берун аз ҳудуди он, бозгӯ мекунад.

АКС: Консулгарии генералии Федератсияи Русия дар шаҳри Хуҷанд / Хонаи русӣ.