Душанбе, 23 май, – АИ «Корвон Иттилоот». Вазири мудофиаи Ҷумҳурии Тоҷикистон Эмомалӣ Собирзода аз яке аз қисмҳои ҳарбии Қувваҳои Мусаллаҳи кишвар дар Вилояти Мухтори Кӯҳистони Бадахшон боздид намуд. Сафар дар доираи назорати сатҳи омодагии ҷангӣ ва шароити хизмати ҳарбиён дар минтақаи аз нигоҳи стратегӣ муҳим анҷом дода шуд.

Тавре Вазорати мудофиаи Тоҷикистон хабар медиҳад, роҳбари ниҳоди дифоӣ бо раванди хизмати ҳарбӣ, сатҳи омодагии ҳайати шахсӣ, вазъи синфхонаҳои таълимӣ, техникаи ҳарбӣ ва шароити иҷтимоиву маишии хизматчиён шинос гардид.

Дар ҷараёни боздид таваҷҷуҳи махсус ба масъалаҳои интизоми ҳарбӣ, омодабошии фаврии ҷузъу томҳо ва сатҳи омодагии сарбозону афсарон барои иҷрои вазифаҳои хизматӣ зоҳир карда шуд. Дар натиҷаи санҷиш Эмомалӣ Собирзода ба интизом ва масъулиятшиносии ҳайати шахсӣ баҳои баланд дод.

Коршиносон бар он назаранд, ки чунин сафарҳои санҷишии роҳбарияти Вазорати мудофиа ба ВМКБ барои таъмини субот ва амнияти минтақаҳои наздимарзӣ аҳамияти махсус доранд. Вилояти Мухтори Кӯҳистони Бадахшон бо назардошти мавқеи ҷуғрофӣ ва ҳаммарзӣ бо Афғонистон яке аз минтақаҳои калидии амнияти стратегии кишвар ба ҳисоб меравад.

Дар шароите ки кишварҳои Осиёи Марказӣ таваҷҷуҳи бештар ба таҳкими иқтидори мудофиавӣ, навсозии артиш ва тақвияти инфрасохтори сарҳадӣ медиҳанд, чунин санҷишҳо ҳамчун қисми сиёсати мунтазами баланд бардоштани самаранокии Қувваҳои Мусаллаҳи Тоҷикистон арзёбӣ мешаванд.

Акс: Вазорати мудофиаи Ҷумҳурии Тоҷикистон