Душанбе, 25 декабр, 2025 – АИ «Корвон Иттилоот». Тоҷикистон ҳузури худро дар яке аз бузургтарин бозорҳои сайёҳии ҷаҳон — Ҷумҳурии Мардумии Чин — пайваста тақвият мебахшад. Аз 19 то 21 декабр ҳайати Ҷумҳурии Тоҷикистон дар Намоишгоҳи байналмилалии сайёҳии Чин – 2025, ки дар шаҳри Ҳайкоуи музофоти Ҳайнан баргузор гардид, иштирок намуд.

Тавре Кумитаи рушди сайёҳии назди Ҳукумати Ҷумҳурии Тоҷикистонхабар медиҳад, иштирок дар ин чорабинии бонуфузи байналмилалӣ қадами муҳим дар роҳи тарғиби иқтидори сайёҳии кишвар ва таҳкими робитаҳои корӣ бо шарикони чинӣ маҳсуб меёбад.

Дар гӯшаи миллии Тоҷикистон самтҳои асосии соҳаи сайёҳӣ, аз ҷумла сайёҳии кӯҳӣ, экологӣ, фарҳангӣ-маърифатӣ ва таърихӣ муаррифӣ карда шуданд. Дар кори намоишгоҳ намояндагони Кумитаи рушди сайёҳӣ, КВД «Маркази иттилоотии хизматрасониҳои сайёҳӣ», ширкати ҳавопаймоии «Сомон Эйр», инчунин ширкатҳои сайёҳии «Сомон Тревел» ва «Шоҳ-Тур» иштирок доштанд.

Дар доираи чорабинӣ вохӯриҳои B2B бо намояндагони бахши сайёҳии Чин баргузор гардиданд, ки зимни онҳо масъалаҳои густариши ҳамкории дуҷониба, ташкили турҳои муштарак ва ҷалби сайёҳони чинӣ ба Тоҷикистон мавриди баррасӣ қарор гирифтанд.

Таваҷҷуҳи махсус ба масъалаи дастрасии нақлиётӣ зоҳир шуд. Айни ҳол ширкати «Сомон Эйр» парвозҳоро ба шаҳри Урумчӣ ҳафтае ду маротиба анҷом медиҳад. Дар нақша аст, ки соли оянда хатсайри мустақим ба шаҳри Гуанчжоу ифтитоҳ гардад, ки ин ба рушди сайёҳии воридотӣ ва афзоиши ҷараёни сайёҳон мусоидат хоҳад кард.

Коршиносон таъкид мекунанд, ки иштироки Тоҷикистон дар Намоишгоҳи байналмилалии сайёҳии Чин ба ташаккули симои кишвар ҳамчун самти ҷолиби сайёҳӣ мусоидат намуда, омодагии ҷумҳуриро барои ҳамгироии фаъол дар равандҳои минтақавӣ ва ҷаҳонии соҳаи сайёҳӣ бозгӯ мекунад.

АКС: Кумитаи рушди сайёҳии назди Ҳукумати Ҷумҳурии Тоҷикистон