Душанбе, 27 апрел, – АИ «Корвон Иттилоот». Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо роҳбарон ва фаъолони вилояти Хатлон мулоқот доир намуд, ки дар он натиҷаҳои семоҳаи якуми соли 2026 ҷамъбаст ва самтҳои афзалиятноки рушди минбаъдаи минтақа муайян карда шуданд.
Сарвари давлат таъкид намуд, ки дар вилоят ба ифтихори 35-солагии Истиқлоли давлатӣ корҳои васеи ободониву созандагӣ идома доранд. Ба гуфтаи ӯ, дар шаҳру ноҳияҳои Хатлон ҳазорҳо иншооти иҷтимоӣ ва истеҳсолӣ бунёд ва мавриди истифода қарор гирифтаанд, ҳамзамон нақшаи сохтмони иншооти ҷашнӣ 112 фоиз иҷро шудааст. Эмомалӣ Раҳмон ба сокинони вилоят, соҳибкорон ва шахсони саховатманд барои саҳмашон дар рушди минтақа изҳори сипос намуда, супориш дод, ки то охири сол боз садҳо иншооти нави ҷашнӣ бунёд карда шавад.
Дар қисми иқтисодии суханронӣ зикр гардид, ки маҷмӯи маҳсулоти минтақавии вилояти Хатлон дар моҳҳои январ-марти соли 2026 ба 7 миллиарду 208 миллион сомонӣ расида, 8 фоиз афзоиш ёфтааст. Бо вуҷуди ин, Президент таъкид кард, ки бо дарназардошти иқтидори вилоят ин суръатҳо ҳанӯз кофӣ нестанд. Ӯ ба рушди бештарини саноат, кишоварзӣ, содирот, ҷалби сармоя ва таъсиси ҷойҳои нави корӣ таъкид намуд.
Ба масъалаҳои буҷет, интизоми андоз, низоми бонкӣ ва рақамикунонӣ низ диққати махсус дода шуд. Эмомалӣ Раҳмон супориш дод, ки ҷамъоварии андозҳо тақвият ёбад, заминаи андоз васеъ карда шавад, қарздорӣ коҳиш ёбад, ҳаҷми қарздиҳӣ ба соҳаҳои истеҳсолӣ зиёд гардад ва дастрасии хизматрасониҳои бонкӣ дар деҳот таъмин шавад. Ҳамчунин аҳамияти рушди иқтисоди рақамӣ, ҷорӣ намудани мукотибаи электрониву густариши интернети баландсуръат таъкид гардид.
Дар соҳаи кишоварзӣ ва энергетика Сарвари давлат истифодаи самараноки замин ва захираҳои об, рушди пахтакорӣ, боғдорӣ ва сабзавоткориро талаб намуда, ҳамзамон кам кардани талафоти неруи барқ ва мубориза бо истифодаи ғайриқонунии онро муҳим арзёбӣ кард.
Ба масъалаҳои маориф, тандурустӣ, сайёҳӣ, тартиботи ҳуқуқӣ ва ҳифзи иҷтимоӣ низ ҷойгоҳи муҳим дода шуд. Эмомалӣ Раҳмон зарурати сохтмони мактабу кӯдакистонҳои нав, навсозии муассисаҳои тиббӣ, рушди инфрасохтори сайёҳӣ ва ғамхории махсус нисбат ба ятимон, маъюбон ва оилаҳои ниёзмандро таъкид кард.
АКС: Хадамоти матбуоти Президенти Ҷумҳурии Тоҷикистон