Душанбе, 16 май, – АИ «Корвон Иттилоот». Дар Тоҷикистон қабули дархостҳо барои иштирок дар барномаи озмунии «Рушди соҳибкорӣ» оғоз гардид, ки ҳадафи он дастгирии соҳибкорони навкор, рушди тиҷорати хурду миёна ва таъсиси ҷойҳои нави корӣ дар минтақаҳои кишвар мебошад. Барнома бо дастгирии молиявиӣ аз Федератсияи Русия баргузор мешавад

Тавре созмондиҳандагон хабар медиҳанд, барнома ҳам барои шаҳрвандоне пешбинӣ шудааст, ки мехоҳанд фаъолияти соҳибкории худро оғоз намоянд ва ҳам барои соҳибкорони амалкунандае, ки ният доранд тиҷорати худро густариш диҳанд.

Дар доираи барнома иштирокчиён метавонанд дар тренингҳои омӯзишӣ ширкат варзида, донишҳои амалӣ ва машваратҳои касбии менторонро дастрас намоянд, инчунин лоиҳаҳои соҳибкории худро мутобиқ ба талаботи бозори муосир такмил диҳанд.

Таваҷҷуҳи махсус ба дастгирии молиявии ташаббусҳо равона шудааст. Лоиҳаҳои беҳтарин метавонанд барои гирифтани грант ба маблағи то 70 ҳазор сомонӣ пешниҳод шаванд. Ба гуфтаи ташкилкунандагон, чунин дастгирӣ на танҳо воситаи рушди бахши хусусӣ, балки механизми муҳими фароҳамсозии шуғл, махсусан барои ҷавонон ва сокинони минтақаҳо арзёбӣ мегардад.

Коршиносон мегӯянд, солҳои охир дастгирии соҳибкории хурду миёна ба яке аз самтҳои калидии сиёсати иҷтимоию иқтисодии Тоҷикистон табдил ёфтааст. Дар шароити афзоиши бозори дохилӣ ва зарурати гуногунсамтсозии иқтисод рушди соҳибкорӣ ҳамчун омили таҳкими устувории минтақаҳо ва коҳиши муҳоҷирати меҳнатӣ арзёбӣ мешавад.

Барнома қариб тамоми минтақаҳои кишварро фаро мегирад. Тренингҳои омӯзишӣ дар шаҳрҳои Душанбе, Хуҷанд, Кӯлоб, Бохтар, Хоруғ, Рашт ва Панҷакент баргузор гардида, имкониятҳои омӯзишӣ ва грантиро барои сокинони минтақаҳои гуногуни ҷумҳурӣ дастрас мегардонад.

Созмондиҳандагон хотиррасон мекунанд, ки шумораи грантҳо маҳдуд буда, муҳлати қабули дархостҳо то 31 майи соли 2026 идома меёбад.

Барои иштирок хоҳишмандон бояд тавассути скан кардани QR-код ё ворид шудан ба пайванди пешниҳодшуда аз қайд гузаранд.

АКС: Муассисаи Давлатии “Ташаккул ва рушди соҳибкории Тоҷикистон”