Душанбе, 22 май, – АИ «Корвон Иттилоот». Ҳайати парлумонии Тоҷикистон таҳти роҳбарии Раиси Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода бо сафари корӣ ба шаҳри Санкт-Петербурги Федератсияи Русия сафар кард. Дар ин бора аз палатаи поёнии парлумони кишвар хабар доданд.

Дар доираи ин сафар ҳайати Тоҷикистон дар ҷаласаҳои Шӯрои Ассамблеяи байнипарлумонии Иттиҳоди Давлатҳои Мустақил, инчунин дар кори комиссияҳои доимии марбут ба масъалаҳои мудофиа, амният, сиёсат ва ҳамкории байналмилалӣ иштирок хоҳад кард.

Интизор меравад, ки Файзалӣ Идизода бо роҳбарони ҳайатҳои парлумонии кишварҳои узви ИДМ мулоқотҳои дуҷониба анҷом диҳад. Дар меҳвари гуфтугӯҳо масъалаҳои таҳкими робитаҳои байнипарлумонӣ, ҳамоҳангсозии мавқеъҳо оид ба амнияти минтақавӣ ва густариши ҳамкориҳо дар бахшҳои сиёсӣ ва башардӯстона қарор доранд.

Дар шароити тағйироти геополитикии ҷаҳонӣ фазои ИДМ ҳамоно яке аз майдонҳои муҳими ҳамоҳангсозии мавқеи кишварҳои минтақа боқӣ мемонад. Дар чунин вазъ дипломатияи парламентӣ аҳамияти бештар касб мекунад — на танҳо ҳамчун абзори муколамаи сиёсӣ, балки ҳамчун механизми таҳияи қарорҳои муштарак дар масъалаҳои амният, муҳоҷират, иқтисод ва рушди устувор.

Барои Тоҷикистон иштирок дар фаъолияти Ассамблеяи байнипарлумонии ИДМ аҳамияти махсус дорад, махсусан дар пасманзари таҳдидҳои минтақавӣ, вазъияти Афғонистон, масъалаҳои амнияти фаромарзӣ ва зарурати таҳкими робитаҳои иқтисодӣ дар фазои пасошӯравӣ.

Коршиносон бар ин назаранд, ки Душанбе солҳои охир иштироки худро дар форматҳои бисёрҷониба фаъолтар намуда, кӯшиш дорад муколамаи сиёсиро бо шарикони худ дар ИДМ тақвият бахшида, имкониятҳои ҳамкории байнипарлумониро ҳамчун ҷузъи муҳими сиёсати хориҷии кишвар густариш диҳад.

Акс: Маҷлиси намояндагони Маҷлиси Олии Ҷумҳурии Тоҷикистон