Душанбе, 11 август, – АИ «Корвон Иттилоот».  Дар Душанбе Ҳафтаи идоракунии стратегии савдо дар Осиёи Марказӣ баргузор гардид, ки беш аз 60 намояндаи мақомоти давлатӣ ва коршиносони соҳавиро аз кишварҳои минтақа ва шарикони хориҷӣ ба ҳам овард.

Дар чорабинӣ мутахассисон аз Тоҷикистон, Қазоқистон, Қирғизистон ва Ӯзбекистон, инчунин коршиносони байналмилалӣ аз ИМА, Эстония, Ҷумҳурии Корея ва Филиппин иштирок намуданд.

Форум ба майдони муҳокимаи масъалаҳое табдил ёфт, ки бевосита ба амният ва шаффофияти ҷараёнҳои тиҷоратӣ дар Осиёи Марказӣ алоқаманд мебошанд. Иштирокчиён ба механизмҳои амалии назорати содирот, ҳифзи масирҳои логистикӣ ва таҳкими эътимод ба занҷираҳои минтақавии таъминот таваҷҷуҳи асосӣ зоҳир намуданд.

Яке аз самтҳои марказии муколама пешгирии интиқоли ғайриқонунии молҳои ҳассос ва маҳсулоти истифодаи дугона буд. Иштирокчиён равишҳоеро баррасӣ карданд, ки имкон медиҳанд самаранокии назорат баланд бардошта шуда, ҳамзамон барои савдои қонунии байналмилалӣ монеаҳои зиёдатӣ эҷод нашаванд.

Ба масъалаҳои амнияти инфрасохтори нақлиётиву логистикии минтақа ва шаффофияти расмиёти гумрукӣ низ таваҷҷуҳи махсус зоҳир гардид. Ба андешаи иштирокчиён, маҳз ҳамин омилҳо заминаи савдои устувори хориҷиро ташаккул дода, ба ҷалби сармоягузорӣ ва пешгӯишаванда будани муҳити соҳибкорӣ дар кишварҳои Осиёи Марказӣ таъсир мерасонанд.

Ҳафтаи идоракунии стратегии савдо бо мусоидати Барномаи содирот ва амнияти сарҳадҳо (EXBS)-и Сафорати ИМА дар Тоҷикистон баргузор гардид. Ин омил ба чорабинӣ формати иловагии байналмилалӣ бахшида, аҳамияти ҳамоҳангсозии талошҳо дар самти таъмини амнияти савдоро таъкид намуд.

Осиёи Марказӣ торафт мавқеи худро ҳамчун фазое таҳким мебахшад, ки дар он манфиатҳои савдои байналмилалӣ, транзит ва ҳамгироии иқтисодӣ ба ҳам мепайванданд. Дар чунин шароит масъалаҳои назорати содирот на танҳо аҳамияти танзимкунанда, балки аҳамияти стратегӣ низ пайдо мекунанд.

Механизмҳои шаффоф ва ҳамоҳангшудаи назорати ҷараёнҳои тиҷоратӣ имкон медиҳанд хавфҳои интиқоли ғайриқонуниро коҳиш дода, пешгӯишавандагии муҳити соҳибкориро баланд бардоранд ва эътимоди шарикони байналмилалиро ба долонҳои нақлиётии минтақа таҳким бахшанд.

Муҳокимаи масъалаҳои идоракунии стратегии савдо дар Душанбе нишон медиҳад, ки амнияти ҷараёнҳои савдои хориҷӣ ба ҷузъи ҷудонашавандаи иқтисоди муосири минтақавӣ табдил меёбад.

Барои Осиёи Марказӣ ин масъала аҳамияти махсус дорад: устувории логистика, самаранокии назорати гумрукӣ ва риояи стандартҳои байналмилалӣ мустақиман ба рақобатпазирии минтақа таъсир мерасонанд. 

Ҳар қадар сатҳи ҳамоҳангсозӣ миёни давлатҳо ва шарикони байналмилалӣ баланд бошад, ҳамон қадар масирҳои тиҷоратӣ боэътимодтар гардида, заминаҳои рушди иқтисодӣ ва ҳамгироии минтақавӣ устувортар мешаванд.

АКС: Сафорати Иёлоти Муттаҳидаи Амрико дар Душанбе, Ҷумҳурии Тоҷикистон