Душанбе, 5 октябр, – АИ «Корвон Иттилоот». 1 октябри соли 2026 дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон мулоқоти муовини якуми вазири тандурустӣ ва ҳифзи иҷтимоии аҳолӣ Саломуддин Юсуфӣ бо ҳайати Вазорати тандурустии Федератсияи Россия таҳти роҳбарии муовини вазири тандурустии Федератсияи Россия Плутнитский А.Н. баргузор гардид.
Дар мулоқот сардорони раёсатҳои дахлдори вазорат, намояндагони сохторҳои марбута ва як қатор мутахассисони соҳаи тандурустии мамлакат иштирок намуданд.
Муовини якуми вазир Саломуддин Юсуфӣ ҳайати меҳмононро хайрамақдам гуфта, оид ба ҳолати кунунӣ ва дурнамои рушди ҳамкориҳои дуҷонибаи Тоҷикистону Россия дар соҳаи тандурустӣ андешаронӣ намуд.
Дар рафти мулоқот масъалаҳои ҳамкории дуҷониба, аз ҷумла нақшаи амал оид ба татбиқи Созишнома байни Ҳукумати Федератсияи Россия ва Ҳукумати Ҷумҳурии Тоҷикистон оид ба муоинаи тиббии шаҳрвандони Ҷумҳурии Тоҷикистон барои ворид шудан ба қаламрави Федератсияи Россия бо мақсади анҷом додани фаъолияти меҳнатӣ мавриди баррасӣ қарор гирифт.
Ба масъалаҳои баланд бардоштани самаранокии татбиқи ҳадафҳо ва муқаррароти ҳуҷҷатҳои дахлдор тавассути ташаккули механизми мувофиқи машваратӣ таваҷҷуҳи хоса зоҳир карда шуд.
Дар анҷоми мулоқот аз ҷониби муовини якуми вазири тандурустӣ ва ҳифзи иҷтимоии аҳолии Ҷумҳурии Тоҷикистон Саломуддин Юсуфӣ ва муовини вазири тандурустии Федератсияи Россия Плутнитский А.Н. нақшаи амал оид ба татбиқи Созишнома ба имзо расид.
Баимзорасии нақшаи амал қадамҳои амалиро оид ба танзими муоинаи тиббии муҳоҷирони меҳнатӣ ва баланд бардоштани шаффофияти расмиёт мустаҳкам мекунад. Барои Тоҷикистон, ки қисми зиёди шаҳрвандонаш дар Россия кор мекунанд, чунин созишномаҳо аҳамияти муҳими иҷтимоӣ ва иқтисодӣ доранд: онҳо ба ҳифзи ҳуқуқи муҳоҷирон, коҳиш додани монеаҳои маъмурӣ ва таҳкими эътимоди мутақобила байни низомҳои тандурустии ду кишвар мусоидат мекунанд. Муколамаи мунтазам ва ҳуҷҷатҳои мушаххас имкон медиҳанд, ки изҳороти сиёсӣ оид ба ҳамкорӣ ба сатҳи механизмҳои воқеӣ, қулай ҳам барои шаҳрвандон ва ҳам барои муассисаҳои тиббӣ гузаранд.
Манбаъ: Вазорати тандурустӣ ва ҳифзи иҷтимоии аҳолии Ҷумҳурии Тоҷикистон