Душанбе, 10 июн, – АИ «Корвон Иттилоот». Дар пойтахти Тоҷикистон 9 июн бинои нави Институти иқтисодиёт ва демографияи Академияи миллии илмҳои Тоҷикистон мавриди истифода қарор гирифт. Ин рӯйдод ҳамчун қадами навбатӣ дар роҳи таҳкими иқтидори илмии кишвар ва рушди инфрасохтори таҳқиқотӣ арзёбӣ мешавад.

Бинои нави институт, ки дар ноҳияи Шоҳмансури шаҳри Душанбе ҷойгир аст, бо иштироки Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе Рустами Эмомалӣ ба истифода дода шуд.

Иншоот дар ҳудуди шаҳраки академии Академияи миллии илмҳои Тоҷикистон бунёд гардида, барои пешбурди корҳои илмӣ-таҳқиқотӣ дар самтҳои иқтисодиёт, демография ва рушди иҷтимоӣ пешбинӣ шудааст. Бино аз шаш ошёна ва таҳхона иборат буда, барои фаъолияти 150 корманди илмӣ шароити мусоид фароҳам меорад.

Таъмини муҳити муосири корӣ барои олимон дар шароити тағйироти босуръати иҷтимоиву иқтисодӣ ва татбиқи барномаҳои дарозмуддати давлатӣ аҳамияти махсус дорад. Маҳз таҳқиқоти илмӣ дар соҳаҳои иқтисодиёт ва демография барои таҳияи дурнамоҳои воқеӣ, арзёбии тамоюлҳои рушди ҷомеа ва қабули қарорҳои муассири идоракунӣ замина фароҳам меоранд.

Ба андешаи коршиносон, масъалаҳои сиёсати демографӣ, бозори меҳнат, урбанизатсия, равандҳои муҳоҷират ва таъмини рушди устувори иқтисодӣ барои Тоҷикистон аҳамияти рӯзафзун пайдо мекунанд. Аз ин рӯ, таҳкими заминаи моддию техникии муассисаҳои илмии соҳавӣ яке аз омилҳои муҳимми баланд бардоштани сифати таҳқиқот ва омодасозии кадрҳои илмӣ ба ҳисоб меравад.

Ифтитоҳи бинои нав инчунин бозгӯи таваҷҷуҳи пайвастаи давлат ба рушди илм, ҷорӣ намудани усулҳои муосири фаъолияти таҳқиқотӣ ва фароҳам овардани шароити беҳтар барои омодасозии мутахассисони ҷавон мебошад.

Интизор меравад, ки бинои нав имкониятҳои институтро барои анҷом додани таҳқиқоти бунёдӣ ва амалӣ, густариши ҳамкориҳои байналмилалии илмӣ ва иштирок дар таҳияи ҳуҷҷатҳои стратегии рушди иҷтимоиву иқтисодии кишвар боз ҳам бештар намояд.

Солҳои охир дар Тоҷикистон барои навсозии инфрасохтори илмӣ, рақамикунонии фаъолияти таҳқиқотӣ ва дастгирии иқтидори илмӣ-маърифатӣ тадбирҳои пайгирона амалӣ мешаванд. Ба истифода додани бинои нави Институти иқтисодиёт ва демография боз як далели он аст, ки рушди илм ҳамчун яке аз унсурҳои калидии рушди устувори давлат арзёбӣ мегардад.

Акс: Шуъбаи иттилооти дастгоҳи Раиси шаҳри Душанбе