Душанбе, 03 сентябр, – АИ «Корвон Иттилоот».  Дар Душанбе намоишгоҳи муштараки виртуалии «Як мерос, ду замин», ки ба 35-солагии истиқлолияти Ҷумҳурии Тоҷикистон бахшида шудааст, баргузор гардид.

Лоиҳа дар доираи ҳамкории байналмилалӣ байни Осорхонаи миллии Тоҷикистон ва Маҷмааи мероси ҷаҳонии «Қасри Гулистон» (Ҷумҳурии Исломии Эрон) амалӣ шудааст.

Қисми тоҷикии намоишгоҳ беш аз 25 намунаи кундалиро аз фонди тиллоии Осорхонаи миллии Тоҷикистон дар бар мегирад. Корҳо аз ҷониби устодони маъруф дар солҳои гуногун офарида шуда, хусусияти яке аз қадимтарин намудҳои санъати миллиро ошкор мекунанд.

Кундал — навъи нодири наққошии анъанавии тоҷикӣ аст, ки ташаккули онро муҳаққиқон ба асри XV–XVI нисбат медиҳанд. Хусусиятҳои хоси техника — нақшҳои наботӣ, геометрӣ, арабескӣ ва зооморфӣ; дар рангҳо тобишҳои кабуд ва осмонӣ-кабуд бартарӣ доранд, ки ҷой-ҷоя бо ранги зард пурра карда шудаанд.

Бахши эронии намоишгоҳ ба истеҳсоли сафол бахшида шуда, дар асоси маводи Қасри Гулистон ташаккул ёфтааст. Дар намоишгоҳ намунаҳои сафолҳои ҳафтранга ва бисёрранга бо нақшҳои гулӣ ва наботӣ, саҳнаҳои дарборӣ ва дигар унсурҳои ороишӣ пешниҳод шудаанд.

Экспонатҳо рушди санъати ороишӣ-амалии Эрон ва хусусиятҳои фарҳанги бадеии давраи Қоҷорҳоро нишон дода, синтези усулҳои анъанавӣ ва тамоюлҳои нави бадеиро намоиш медиҳанд.

Формати виртуалии намоишгоҳи муштарак ба аудиторияи васеъ имкон медиҳад, ки бо решаҳои умумии фарҳангии ду халқ ва бойии мероси бадеии онҳо шинос шаванд. Лоиҳа нақши муассисаҳои осорхонаиро дар ҳифз ва пешбурди санъатҳои анъанавӣ таъкид карда, муколамаи фарҳангиро байни Тоҷикистон ва Эрон дар соли 35-солагии истиқлолияти ҷумҳурӣ таҳким мебахшад.

Акс: Осорхонаи миллии Тоҷикистон