Душанбе, 5 октябр, – АИ «Корвон Иттилоот». Дар Хонаи русии шаҳри Душанбе 02 октябр  мизи мудаввар бахшида ба аҳамияти таърихию ҳуқуқии мурофиаи Нюрнберг ва ҳифзи шаҳодатҳо дар бораи ҷиноятҳои солҳои Ҷанги дуюми ҷаҳон баргузор гардид.

Дар он дипломатҳои ҷавон ва ҳуқуқшиносон иштирок намуда, масъалаҳои ҷавобгарӣ барои ҷиноятҳои ҳарбӣ, принсипҳои ҳуқуқи байналмилалӣ ва аҳамияти қарорҳои судиро, ки ба рушди низоми адолати байналмилалӣ таъсир гузоштаанд, баррасӣ карданд.

Дар доираи вохӯрӣ чор ҳайати коршиносӣ бо маводи бойгонӣ кор карда, ҳуҷҷатҳоро таҳлил ва хусусиятҳои расмиёти судиро мавриди муҳокима қарор доданд. Иштирокдорон мубодилаи афкор намуда, саволҳо пешниҳод карданд, мавқеъҳои худро баён ва ҳимоя карданд. Натиҷаи ин кор таҳия ва имзои коммюникеи муштарак аз ҷониби намояндагони ҳайатҳо гардид.

Муроҷиат ба таҷрибаи Нюрнберг дар ҷараёни вохӯрӣ танҳо ба доираи баҳси таърихӣ маҳдуд нашуд. Ба иштирокдорон муроҷиати Шӯрои Федератсияи Маҷлиси Федералии Федератсияи Русия ба Созмони Милали Муттаҳид, созмонҳои байналмилалии парламентӣ ва парламентҳои давлатҳои хориҷӣ пешниҳод гардид, ки ба 85-умин солгарди оғози муҳосираи Ленинград бахшида шудааст.

Дар ин ҳуҷҷат ба 872 рӯзи муҳосираи Ленинград ва ҷиноятҳои низомиёни фашистӣ таваҷҷуҳи махсус зоҳир шудааст, ки дар ҳукми Трибунали байналмилалии ҳарбӣ дар Нюрнберг баҳои ҳуқуқии худро гирифтаанд.

Ҳамин тариқ, шаҳодатҳои таърихӣ на танҳо ҳамчун бахше аз хотираи ҷанг, балки ҳамчун маводи муҳим барои дарки ташаккули механизмҳои ҳуқуқии байналмилалии ҷавобгарӣ барои ҷиноятҳои зидди башарият ва ҷиноятҳои ҳарбӣ баррасӣ шуданд.

Дар анҷоми вохӯрӣ иштирокдорон бо намоишгоҳи «Дарсҳои Нюрнберг» шинос шуданд, ки онро Осорхонаи Ғалаба бо иштироки Ҷамъияти ҳарбию таърихии Русия омода кардааст. Экспозитсия дар бораи таърихи мурофиаи Нюрнберг, қарорҳои асосии он ва аҳамияти ин раванд барои ташаккул ва рушди адолати байналмилалӣ маълумот медиҳад.

Муроҷиат ба ҳуҷҷатҳо, шаҳодатҳои бойгонӣ ва қарорҳои ҳуқуқии Нюрнберг ба иштирокдорон имкон дод, ки робитаи миёни хотираи таърихӣ ва принсипҳои муосири ҳуқуқи байналмилалиро баррасӣ намоянд. Дар ҷараёни мулоқот аҳамияти ҳифзи шаҳодатҳои боэътимод дар бораи рӯйдодҳои гузашта барои наслҳои оянда низ таъкид гардид.

ФОТО: Хонаи русӣ дар Душанбе